न्युजपोलार समाचारदाता
ललितपुर, ९ मंसिर । किष्ट शिक्षण अस्पताल इमाडोलद्वारा शनिबार ललितपुर महानगरपालिका वार्ड नं ११ मा अवस्थित बंगलामुखी मन्दिर परिसरमा विशेषज्ञ स्वास्थ्य शिविरको आयोजना गरियो ।
सो स्वास्थ्य शिविरमा ललितपुर महानगरपालिका अन्तर्गतका करिब ३१९ जना विरामीले स्वास्थ्ये सेवा लिएका थिए । त्यस स्वास्थ्य शिविरमा विशेषगरी मुटुरोग, महिला तथा बालबालिकाको स्वास्थ्यका साथै नाक कान घाँटीसम्बन्धी विशेषज्ञता सेवा पनि प्रदान गरिएको उक्त स्वास्थ्य शिविरका संयोजक डा.सुजिता हिराचनले जानकारी दिनुभयो ।
सो स्वास्थ्य शिविरपछि त्यस विषयमा जानकारी दिँदै डा हिराचनले उच्च रक्तचाप भएका नागरिकले समयमै आवश्यक अन्य स्वास्थ्य जाँच गराउनुपर्नेमा जोड दिनुभयो ।
उहाँले भन्नुभयो– समय समयमा स्वास्थ्य जाँच गराउने र उच्च रक्तचापको समस्या देखियो भने त्यसबाट नागरिकमा आँखामा समस्या देखिनुका साथै मिर्गौला रोगको पनि समस्या हुने भएकोले समय समयमा स्वास्थ्य जाँच गराउनुपर्छ ।
उक्त स्वास्थ्य शिविरमा स्वास्थ्य सेवा उपलब्ध गराउनुहुने वरिष्ठ चिकित्सकहरुमा डा.सुजिता हिराचनका अतिरिक्त प्रा.डा.लक्ष्मणप्रसाद टिवरेवाला, डा.अभिशेख थापा, डा.सन्तोष गौतम, डा.सुभास सिंह, डा.मिनाक्षी ठाकुर र डा.सुभास खड्का पनि हुनुहुन्थ्यो ।
