काठमाडौँ । संयुक्त अरब इमिरेट्स (युएई) मा जारी आइसीसी महिला टी–ट्वान्टी विश्वकप एसिया छनोटअन्तर्गत नेपालले आज मलेसियालाई ६ विकेटले पराजित गरेको छ । दुबईको आइसीसी एकेडेमी मैदानमा टस जितेर बलिङ रोजेको नेपालले मलेसियालाई ९२ रनमा समेटेको थियो । मलेसियाले ७ विकेटको क्षतिमा उक्त रन बनाएको हो ।
मलेसियाका लागि एल्सा हन्टरले सर्वाधिक ३९ रन बनाइन् । अन्य खेलाडीमा मास इलिसाले १४ र युसरिना याकोपले १२ रन जोडे । मलेसियाका दुई खेलाडी रनआउट भएका थिए ।
नेपालका लागि सबनम राईले २ विकेट लिइन् । त्यसैगरी नेपाली बलरहरु कविता कुँवर, सीता रानामगर र रुबिना क्षेत्रीले समान १ विकेट लिए ।
त्रियानब्बे रनको लक्ष्यसहित मैदानमा ओर्लिएको नेपाली टोलीले १८ दशमलव २ ओभरमा ४ विकेटको क्षतिमा उक्त लक्ष्य हासिल गरेको थियो । नेपालका लागि सीता रानामगरले सर्वाधिक ३० रन बनाइन् ।
त्यसैगरी कप्तान रुबिना क्षेत्रीले २०, सरिता मगरले नटआउट १५ र कविता कुँवरले १० रन जोडे । नेपालका पनि सीता रानामगर, क्याप्टेन रुबिना क्षेत्री र कविता कुँवर रनआउट भएका थिए । मलेसियाका लागि एक मात्र विकेट इसा एलिसाले लिएकी थिइन् ।
ग्लोबल छनोटको सम्भावना कायमै राख्नका लागि नेपालले आज मलेसियाविरुद्धको खेल जित्नै पर्ने बाध्यता थियो । छनोटअन्तर्गत नेपालले चार खेलमध्ये तीन खेलमा जित तथा एक खेलमा हार बेहोरेको छ । नेपालले अब आइतबार संयुक्त अरब इमिरेट्सँग खेल्नेछ ।
