काठमाडौं । अख्तियार दुरुपयोग अनुसन्धान आयोगले सिड किट्स वितरणमा अनियमितता भएको भन्दै भ्रष्टाचार मुद्दा दायर गरेको छ ।
अख्तियारले जिल्ला कृषि विकास कार्यालय दैलेखका तत्कालिन प्रमुख वरिष्ठ कृषि विकास अधिकृत डा.नरहरि घिमिरेसहित प्रमुखसहित १२ जना कर्मचारीविरुद्ध भ्रष्टाचार मुद्दा दायर गरेको छ ।
कृषिका कर्मचारी र ठेकेदारको आपसि मिलेमतोमा सिड किट्स खरिद नै नगरी खातामा खरिद गरेको भनेर ढुवानीको रकम समेत खुलाई नक्कली विल भर्पाई बनाएर ठगि लिएको अख्तियारले जनाएको छ ।
अख्तियारका अनुसार अधिकृत सूर्यनाथ योगी, कृषि प्रसार अधिकृत नरेन्द्रबहादुर थापा, लेखा अधिकृत ढालबहादुर हमाल, प्राविधिक सहायक गमान सिंह थापा, वागवानी विकास अधिकृत भुवनबहादुर मल्ल, नायब सुब्बा नमराज थापा, लेखापाल रामकुमार शाह, प्राविधिक सहायक मिमबहादुर शाही, नायब प्राविधिक सहायक रगबहादुर वपाल, प्राविधिक सहायक पूर्णबहादुर थापा र सव इन्जिनियर रामप्रसाद शर्माविरुद्ध भ्रष्टाचार मुद्दा दायर गरेको हो ।
अख्तियारले तत्कालिन कार्यालय प्रमुख डा.नरहरि घिमिरेसँग १० लाख ५० हजार ९ सय ६१ रुपैयाँ विगो माग दावी गरेको छ । अधिकृत सूर्यनाथ योगीसँग १८ लाख ३६ हजार ४०० र लेखा अधिकृत ढालबहादुर हमालसँग १२ लाख ४६ हजार ४ सय ८१ रुपैयाँ विगो माग गरिएको हो ।
