जनकपुरधाम – पार्टी सभापतिमा उम्मेदवारी दिने घोषणा गरेको अर्को दिन शुक्रबार नेपाली कांग्रेसका उपसभापति विमलेन्द्र निधिलाई पहिलो गाँसमै ढुंगा लागेको छ ।
प्रदेश सभा क्षेत्रीय अधिवेशनअन्तर्गत धनुषा क्षेत्र नम्बर १ (ख) मा भएको निर्वाचनमा निधि समर्थक पराजित भएका छन् । उनको समर्थनमा उठेका उम्मेदवार मदन यादव अध्यक्षमा नराम्ररी पराजित भएका हुन् ।
सभापतिमा ऋषिकेश लामा निर्वाचित भएका छन् । उनी पार्टी सभापति शेरबहादुर देउवाको समर्थनमा उम्मेदवार बनेका थिए । उनलाई नेता आनन्द ढुंगानाको पनि आशिर्वाद थियो ।
दुई दिनदेखि सहमति जुटाउन प्रयास गरिए पनि अन्ततः निर्वाचनमै जाने निर्णय भएको थियो । बिहीबार राति सम्पन्न मतदानबाट लामाले २५७ मत ल्याएका छन् भने उनका प्रतिद्वन्द्वी यादवले ५७ मत मात्र ल्याएका छन् ।
धनुषा जिल्लामै निधिको प्रभाव ज्यादै नगण्य रहेको राजनीतिक वृत्तमा चर्चा छ । देशका अन्य जिल्ला एवं क्षेत्रमा समेत निधिको उपस्थिति शून्य छ । पार्टीका जिल्ला सभापतिहरुको नतिजा धमाधम प्राप्त भइरहे पनि निधि पक्षधर कुनै पनि नेता सभापतिमा चुनिएका छैनन् ।
तर पनि निधि केन्द्रीय सभापतिमा उठ्ने घोषणा गरेर ठूलो जोखिम उठाउन लागि परेका छन् ।
