नेपालगञ्ज । बाँकेको खजुरा गाउँपालिकामा रहेका तीन वटा मदरसा अहिले अत्यन्त नाजुक अवस्थामा पुगेका छन् ।
ती मदरसालाई अन्य मदरसामा विलय गर्नुपर्ने वा खारेज गर्नुपर्ने स्थानीयवासीको माग छ । गाउँपालिकामा रहेका कुल १७ मदरसामध्ये पाँच मदरसामा सुधारको खाँचो रहेको गाउँपालिकाका प्रमुख प्रशासकीय अधिकृत बमबहादुर केसीले बताउनुभयो ।
नाजुक अवस्थामा रहेका ती मदरसाको भौतिक, शैक्षिक तथा अन्य पूर्वाधारको अवस्था सुधारका लागि हदैसम्मको प्रयास गरिने गाउँपालिका अध्यक्ष किस्मतकुमार कक्षपतिको भनाइ छ ।
“हामी यही आर्थिक वर्षभित्र मदरसाको सुधारका लागि योजना बनाएर अघि बढ्छौँ, त्यसका लागि जिल्ला शिक्षा समन्वय समितिसँग समन्वय र सहकार्यको प्रयास गरिनेछ”, अध्यक्ष कक्षपतिले भन्नुभयो । मदरसाको शैक्षिक स्तरोन्नति गर्न स्पष्ट मदरसा शिक्षा नीति आवश्यक रहेको बताउँदै अध्यक्ष कक्षपतिले विद्यार्थी सङ्ख्या नभएका गाउँपालिका क्षेत्रका मदरसालाई शैक्षिक अनुदान पनि दिन नसकिने बताउनुभयो ।
विशेषतः मुस्लिम समुदायका बालबालिका अध्ययन गर्ने मदरसाको अवस्था सुधारका लागि सरोकारवाला पक्षबीच सहमति र ठोस योजना हुनुपर्ने गाउँपालिकाको ठहर छ । रासस
