काठमाडौं । लिग लिडर मनाङ मर्स्याङ्दी क्लबले शहिद स्मारक ए डिभिजन लिग फुटबलमा आज संकटा क्लबसँग प्रतिस्पर्धा गर्ने भएको छ । आज हुने खेलमा मनाङले संकटालाई पराजित गरे दुई खेल अघि नै उपाधि जित्ने छ ।
ललितपुरको सातदोबोटोस्थित एन्फा कम्प्लेक्समा आज हुने खेलमा यदि मनाङले जित हात पारे लिगको ६४ बर्षको इतिहासमा नयाँ कीर्तिमानीको साथ उपाधि उचाल्ने भएको हो ।
यदि आजको खेलमा मनाङ संकटा क्लबसँग बराबरी वा पराजित भएमा संकटा र थ्रीस्टारको उपाधि यात्रा कायमै रहने छन् । १०औं खेलसम्म लगातार जित हात पारेको मनाङले ११औं खेलमा पनि शतप्रतिशत जित हात पार्ने लक्ष्यमा रहेको छ ।
मनाङको १० खेलबाट ३० अंक बटुलेकोछ । संकटाको भने १० खेलबाट २५ अंक रहेको छ । त्यस्तै लिगको तेस्रो स्थानमा रहेको थ्रीस्टारको १० खेलबाट २३ अंक रहेको छ ।
आजै हुने पहिलो खेलमा विभागीय टिम एपीएफ क्लब र च्यासल युथ क्लबबीच पनि प्रतिस्पर्धा हुनेछ । विहान ११ बजे हुने खेलमा दुवै टिम जितको खोजीमा रहेका छन् ।
