एजेन्सी । रोबर्ट लेवान्डोस्कीको ह्याट्रिकसहित जर्मन क्लब बायर्न म्युनिखले उत्कृष्ट जित निकाल्दै युइएफए च्याम्पियन्स लिगको क्वाटरफाइनलमा स्थान बनाएको छ ।
मंगलबार राति भएको अन्तिम १६ को दोस्रो लेगमा बायर्नले अष्ट्रियन क्लब साल्जवर्गलाई ७–१ को तथा एग्रिगेटमा ८–२ को सानदार जित निकाल्दै च्याम्पियन्स लिगको अन्तिम आठमा स्थान पक्का गरेको हो ।
पहिलो लेग १–१ गोलको बराबरीमा टुंगिदा बायर्नले दोस्रो लेगमा एकपक्षीय जित निकाल्यो ।
घरेलु मैदान एलियान्ज एरिनामा भएको खेलमा बायर्नलाई जित दिलाउन लेवान्डोस्कीले ह्याट्रिक गरे भने थोमस मुलरले दुई तथा सर्ज जिनाब्री र लेरोए सानेले एक-एक गोल गरे ।
यस्तै मंगलबार राति नै भएको प्रि क्वाटरफाइनलको अर्को खेल अन्तर्गत दोस्रो लेगमा इटालियन क्लब इन्टर मिलानसँग १-० गोलले पराजित भएपनि इंग्लिस क्लब लिभरपुलले समग्र नतिजामा जितसहित क्वाटरफाइनलमा स्थान बनाएको छ ।
लिभरपुलको मैदानमा गएराति भएको खेलमा इन्टरले लिभरपुललाई १-० गोलले हरायो । इन्टरका लागि लौटारो मार्टिनेजले ६१ औं मिनेटमा गोल गरे । ६३ औं मिनेटमा एलेक्सिस सान्चेजले रातो कार्ड खाँदै मैदान बाहिरिएका थिए ।
तर, लिभरपुलले पहिलो लेगमा इन्टरलाई उसकै मैदानमा २-० गोलले पराजित गरेको हुनाले लिभरपुलले एग्रिगेटमा २-१ को नतिजा निकाल्यो ।
