काठमाडाैंः नेपाल राष्ट्र बैंकले क्षेत्रीय रुपमा सञ्चालित विकास बैंक र फाइनान्स कम्पनीलाई प्रादेशिक संरचनामा लैजान नयाँ व्यवस्था ल्याएको छ ।
केन्द्रीय बैंकले शुक्रबार निर्देशन जारी गर्दै विकास बैंक र फाइनान्स कम्पनीलाई प्रादेशिक रुपमा सञ्चालनका लागि चुक्ता पुँजी निर्धारण गरेको हो ।
प्रादेशिक विकास बैंकका लागि १ अर्ब २० करोड र फाइनान्सको लागि ५० करोड रुपैयाँ चुक्ता पुँजी पुर्याउनुपर्ने राष्ट्र बैंकले जनाएको छ । तोकिए बमोजिमको चुक्ता पुँजी पूरा नगरेसम्म हाल कायम रहेका जिल्लाहरुमा सीमित रही कारोबार सञ्चालन गर्नुपर्ने निर्देशनमा भनिएको छ ।
अहिले एक भन्दा बढी प्रदेशमा शाखा सञ्चालनमा रहेका वित्तीय संस्थाले एउटै प्रदेशमा सीमित गर्नुपर्ने भएको छ । यसका लागि राष्ट्र बैंकले २०७७ असारसम्मको समयसीमा दिएको छ ।
अर्को प्रदेशमा रहेको शाखा बन्द वा स्थानान्तरण नगरे स्वीकृति लिएको प्रदेशमा बिस्तार गर्न पाइने छैन । चुक्ता पुँजी पूरा गर्ने बेलामा मर्जर वा प्राप्तिलाई प्राथमिकतामा राख्न पनि निर्दशनमा भनिएको छ ।
