चितवन । नेकपा एमाले अध्यक्ष केपी शर्मा ओलीले पार्टी एकतालाई बिथोल्ने गरी अस्वस्थ प्रतिस्पर्धा नगर्न आग्रह गर्नुभएको छ । पार्टीको १० औं महाधिवेशन अन्तरगत बन्द सत्रलाई सम्वोधन गर्दै अध्यक्ष ओलीले एकजना मात्रैको अस्वस्थ व्यवहारले सिंगै पार्टीको छविमा आँच आउने बताउनुभयो ।
उहाँले भन्नुभयो, "लोकतान्त्रिक अभ्यासलाई प्रतिस्पर्धाका रुपमा मात्रै बुझ्न हुँदैन, कसै न कसैले कुनै न कुनै जिम्मेवारी सम्हाल्नैपर्छ । तर, आफ्नो महत्वाकांक्षालाई लिएर अस्वस्थ प्रतिस्पर्धा नगरौं । प्रतिस्पर्धाले संस्थालाई नोक्सानी पुर्याउने काम नगरौं । पार्टीको एकतामा प्रतिकूल असर पार्ने कामहरु नगरौं ।"
बन्द सत्रमै ओलीले भन्नुभयो, "फेरि पनि पालो आउँछ। हामीसँग सानो भए पनि देश छ । यत्रा पालिकाहरु छन् । प्रदेशसभा छन् । प्रतिनिधिसभा छ, राष्ट्रिय सभा छ। अनेक शाखा, टोलदेखि केन्द्रीय कमिटीसम्म विभिन्न ठाउँहरु छन् । अहिले नभए अर्को समय आउँछ । हतारोका साथ प्रतिस्पर्धा नगरौं । लोकतान्त्रिक अभ्यास भनेको प्रतिस्पर्धा मात्र होइन । यतिबेला सिंगो देशले हामीलाई हेरिरहेको छ ।"
महाधिवेशनमा सहभागी प्रतिनिधिलाई ओलीले भन्नुभयो, "पार्टीप्रति जनविश्वास कमजोर हुने कुनै पनि क्रियाकलाप नगरौं । अध्यक्ष ओलीले नेता कार्यकर्ताले बुझेर वा नबुझेर नीति र विचार छैन भने पनि अब त्यसो नगरौं ।"
बन्द सत्र भइरहेको सौराहामा आजै केही कार्यकर्ताले प्रतिस्पर्धाका आधारमा नभइ सहमतिमै नेतृत्व छान्नुपर्ने भन्दै नाराबाजी पनि गरेका थिए ।
