बिर्तामोड । लागूपदार्थ खैरो हेरोइन कारोबार भइरहेको सूचनाका आधारमा सादा पोसाकका प्रहरी अर्जुनधारा १० को चुथाई पुगेका थिए । टोलीले शंकास्पद घरमा खानतलासी गर्यो । तर, कतै पनि भनिएको वस्तु फेला परेन । प्रहरी टोली निराश भएर फर्कन खोज्दै थियो । तर, टोलीमा खटिएका लागूऔषध ब्युरोका नायब निरीक्षक अनुप निरौला घरको भान्सामा छिरे । चुलोमाथि एउटा भाँडामा दूध राखिएको रहेछ । दूधको भाँडामा हात डुबाएपछि उनी चकित भए ।
त्यही भाँडाभित्र २ सय २ ग्राम हेरोइन डुबाएर राखिएको पो रहेछ । ‘निराश भएर फर्किन लाग्दा दूधको भाँडामा पो छ कि भनेर टेस्ट गरेको थिएँ’, निरौलाले भने, ‘हामीले खोजेको वस्तु त त्यहीँ पो रहेछ ।’ जिल्ला प्रहरी, इलाका प्रहरी बिर्तामोड र लागूऔषध नियन्त्रण ब्युरो काँकडभिट्टाको संयुक्त टोलीले शनिबार ठूलो परिमाणमा लागूपदार्थ खैरो हेरोइनसहित चार जना कारोबारीलाई नियन्त्रणमा लिएको छ । २ सय ३३ ग्राम खैरो हेरोइनसहित चार जनालाई पक्राउ गरेको छ ।
यो परिमाण अहिलेसम्मको धेरै भएको प्रहरीले बतायो । ‘यति धेरै परिमाणको लागूऔषध यसअघि बरामद गरिएको थिएन,’ झापाका प्रहरी उपरीक्षक भीम ढकालले आइतबार पत्रकार सम्मेलनमा भने, ‘यो अपरेसनलाई झापा प्रहरीले ठूलो सफलताका रूपमा लिएको छ ।’ बरामद सामानको बजार मूल्य करिब १५ लाख रुपैयाँ हो ।
प्रहरीका अनुसार लागूऔषध नियन्त्रण ब्युरो कोटेश्वरबाट प्राप्त गोप्य सूचनाअनुसार पाँचथरको फाल्गुनन्द १ घर भई हाल दमक ६ मा बस्ने संग्रामसिंह आङदम्बे, ताप्लेजुङ थुम्बेदिन घर भई अर्जुनधारा १० डेरामा बस्ने भीमबहादुर अधिकारी, सोही स्थानकी ओममाया खतिवडा र झापा कचनकवलकी रेवतीमाया डाँगीलाई प्रहरीले नियन्त्रणमा लिएको छ ।
प्रहरीले सुरुमा आङदम्बेलाई ३१ ग्राम हेरोइनसहित पक्राउ गरेको थियो । उनको बयानका आधारमा भीमबहादुर, ओममाया र रेवतीमायालाई पक्राउ गरेको हो । उनीहरूको साथबाट लागूऔषध तौलने डिजिटल तराजु, मे १०प नम्बरको बुलेट मोटरसाइकल, मोबाइल थान ३ तथा १३ हजार रुपैयाँसमेत बरामद भएको छ । प्रहरी उपरीक्षक ढकालका अनुसार उक्त लागूऔषध भारतबाट ल्याएर बिक्रीका लागि स्टक राखिएको प्रारम्भिक अनुसन्धानले देखाएको छ । यो समाचार कान्तिपुर दैनिकबाट लिइएको हो ।
