काठमाडौँ । संघीय संसदको बैठकमा आज कर्मचारी समायोजन अध्यादेश अस्विकार गरियोस् भन्ने प्रस्ताव पेस हुने भएको छ ।
काँग्रेस सांसद गगनकुमार थापा र नेपाल मजदुर किसान पार्टीका सांसद प्रेम सुवालले अध्यादेश अस्विकार गर्न माग गर्दै छुट्टा छुट्टै प्रस्ताव पेस गर्नुहुने भएको हो ।
अध्यादेशमा एउटा सेवा समूहबाट अर्को सेवा समूहमा कर्मचारी पठाउने व्यवस्था गर्नु संविधानविपरीत रहेको भन्दै काँग्रेस सांसद थापाले गैरसंवैधानिक अध्यादेश अस्विकार गर्न माग गर्नु भएको छ ।
उहाँले अध्यादेशमा व्यवस्था भएका कतिपय प्रावधान विभेदकारी भएकाले त्यस्तो विभेदकारी कानुन पारित गर्न नमिल्ने दावी गर्नु भएको छ ।
नेपालको संविधानले कर्मचारीको सेवा समूह परिवर्तन गर्दा अनिवार्य रूपमा लोकसेवा आयोगसँग सहमति लिनुपर्ने व्यवस्था गरेको छ । संविधानको धारासँग बाझिने गरी कानुन बनाउन नपाइने भन्दै लोकसेवा आयोगले सरकारको गम्भीर ध्यानाकर्षण गराएको छ भने आयोगको स्विकृती विना नै अध्यादेश ल्याइएको छ ।
दिउसो १२ बजेपछि बस्ने बैठकमा अस्विकार गर्ने प्रस्तावमा मतदान भएपछि सामान्य प्रशासन मन्त्री लालबाबु पण्डीतले अध्यादेश स्विकार गरियोस् भन्ने प्रस्ताव पेस गर्नुहुनेछ ।
आजको बैठकमा अन्य मन्त्रीहरुले पनि केही विधेयकहरु पेस गर्ने कार्यसूची रहेको संसद सचिवालयले जनाएको छ ।
