काठमाडौं । नेपाली कांग्रेसले वाइडबडी विमान खरिदमा भएको भ्रष्टाचार प्रकरणमा सरकारको राजिनामा मागेको छ । नेपाली काँग्रेसका सांसद अमरेश कुमार सिंहले सरकारले नैतिकताका आधारमा राजीनामा दिनुपर्ने बताएका हुन् ।
मंगलबार प्रतिनिधिसभाको विशेष समयमा बोल्दै उनले सरकारले राजिनामा दिनुपर्ने जिकीर गरेका हुन् । सरकारले सुशासन र समृद्धिको नारा दिने तर यति ठूलो भ्रष्टाचारमा पनि राजिनामा नदिने भन्दै राजीनामा माग गरेका हुन् ।
आज बोल्ने अधिकांश सांसदले सरकार भ्रष्टाचारमा डुबेको आरोप लगाएका थिए । काँग्रेसका सबैजसो सांसदले यो आरोप लगाएका छन् । वाइडबडी खरिदमा भएको भ्रष्टाचार छानबिन गर्न संघीय संसदको दुबै सदनको संयुक्त समिति गठन गर्नुपर्ने उनले बताए । छानबिनपछि सरकारले नैतिकताको आधारमा रााजीनामा दिनुपर्छ– सांसद डा.सिंहले भने ।
सांसद सिंहले यस प्रकरणमा भ्रष्टाचार भएको सम्पूर्ण प्रमाण आफूसँग रहेको पनि दाबी गरे । उनले भने यदि कसैलाई चाहिन्छ भने दिन म तयार छु र म संसदलाई ती सबै प्रमाण दिन्छु ।
वाइडबडी खरिदका विषयमा सार्वजनिक लेखासमिति र अन्तर्रा्ष्ट्रिय सम्बन्ध तथा श्रम समितिले छानबिन गरिरहेका बेला सांसद सिंहले प्रतिनिधिसभा र राष्ट्रियसभाको संयुक्त संसदीय समितिले छानबिन गर्नुपर्ने माग गरेका हुन् ।
