पोखरा । मनाङबाट निर्वाचित गण्डकी प्रदेशका राजीव गुरुङ (दीपक मनाङे) ले प्रदेशसभा सदस्यको सपथ लिन नपाउने जानकारी दिइएको छ । उनी गण्डकी प्रदेशको सदस्यका रुपमा सपथ लिन आज पोखरा पुगेका थिए । गण्डकी प्रदेश सभाका सभामुख नेत्रनाथ अधिकारीले कानुनअनुसार सपथ गराउन नमिल्ने निश्कर्ष निकालेको जानकारी दिएका छन् ।
उक्त प्रदेश सभाको बैठक सोमबारदेखि सुरु हुने भनिएको थियो । सो अधिवेशनको कार्यसूचि तयार पार्न बसेको कार्य व्यवस्था परामर्श समितिका सभापतिसमेत रहेका सभामुख अधिकारीले राजीवलाई सपथ नराउने निर्णय गरिएको जानकारी दिएका हुन् । राजीवलाई सपथ खुवाउने–नखुवाउने विषयमा सांसदहरुको फरकफरक मत छ । सभामुख अधिकारीले सपथका विषयमा छलफल गर्न परामर्श समितिको बैठक डाकेका थिए । आइतबारको उक्त बैठकले सपथ गराउने–नगराउने विषयमा छलफल भएको र उक्त छलफलबाट सपथ नगराइने निर्णय भएको हो ।
मनाङेले मंसिर १२ गते बिहीबार गण्डकी प्रदेश सभामा सपथ ग्रहणको माग गर्दै निवेदन दिएका छन् ।सर्वोच्चबाट थुनामुक्त भएपछि प्रदेश सभा सचिवालयमा गुरुङको निवेदन पुगेपछि सभामुख अधिकारी विभिन्न व्यक्तिसँथ छलफल तथा राय मागेका थिए । मनाङेले १२ गते एक व्यक्तिमार्फत प्रदेशसभामा सपथको माग गर्दै लिखित निवेदन दर्ता गराएका थिए ।
मनाङेलाई उच्च अदालत पाटनले ज्यान मुद्दामा दोषी ठहर गरेको छ । उनले सर्वोच्च अदालतमा मुद्दा पुनरावेदन गरेर धरौटी बुझाएकाले हाल थुनामुक्त अवस्थामा छन् ।
