चितवन । नेकपा एमालेको अध्यक्षका लागि केपी शर्मा ओली र भीम रावलबीच प्रतिस्पर्धा हुने भएको छ । सोमबार बिहान बन्दसत्रमा अध्यक्ष ओलीले पदाधिकारी तथा केन्द्रीय सदस्यहरुको नाम प्रस्ताव गरेपछि त्यसमा रावलले असहमति जनाउनु भएको थियो ।
उपाध्यक्षमा बस्न गरिएको प्रस्तावलाई अस्वीकार गर्दै रावलले आफू अध्यक्षमा उम्मेदवारी दिने प्रक्रियामा निकै अघि बढिसकेको जानकारी गराउँदै प्रस्तावित पद प्रति असहमति जनाउनु भएको थियो ।आइतबार दिनभर बन्दसत्र रोकेर सहमतिका लागि पहल भएपनि अध्यक्ष ओलीको अभियान सफल हुन सकेन । निर्बिरोध अध्यक्ष बन्ने ओलीका प्रयासमा रावलले चुनौती दिनु भएको छ ।
बन्दसत्रलाई सम्बोधन गर्ने क्रममा ओलीले भन्नुभयो, ‘मैले धेरै पटक भीम रावललाई उपाध्यक्षको उम्मेदवार बन्न आग्रह गरें, तर सम्झाउन सकिएन ।’ ओलीको अभिव्यक्ति पछि रावलले भन्नुभयो, ‘रात गएर बिहान भयो, कमरेडहरु सुत्न पाउनुभएको छैन, लामो बोल्दिनँ । मलाई फर्किन गाह्रो हुन्छ, अध्यक्षमा उम्मेदवारी दिन्छु ।’
रावलले बोलेपछि हलमा होहल्ला भएको थियो । अध्यक्ष ओलीले शान्त रहन आग्रह गर्दै भीम रावल उम्मेदवार हुन्छु नै भन्ने हो भने उठ्न दिनुपर्छ भने पछि रावल बिरुद्धको नाराबाजी रोकिएको थियो ।
