काठमाडौं । उच्च अदालत विराटनगरले सुन तस्करी र सनम शाक्य हत्या अपराधमा पुर्पक्षका लागि जेल परेका निलम्बित एसएसपी श्यामबहादुर खत्री र एयरलाइन्स कर्मचारी अमरमान डंगोललाई थुनामै राख्न अन्तिम आदेश गरेको छ । नयाँ पत्रिका दैनिकले समाचार छापेको छ ।
बिहीबार उच्च अदालत विराटनगरका मुख्यन्यायाधीश कुलरन्त भुर्तेल र जनक पाण्डेको इजलासले जिल्ला अदालत मोरङको आदेशलाई सदर गर्दै खत्री र डंगोललाई थुनामै राखेर पुर्पक्ष गर्न अन्तरिम आदेश गरेको हो ।
संगठित सुन तस्करी र सनम शाक्य हत्या आरोपमा उनीहरूलाई मोरङ जिल्ला अदालतले पुर्पक्षका लागि थुनामा राख्न आदेश गरेको थियो । तर, अभियुक्तहरूले जिल्लाको आदेश बेरीत भएको भन्दै रीतपूर्वक आदेशका लागि उच्च अदालतमा निवेदन गरेका थिए ।
प्रधान्यायाधीशको आदेशमा उच्च अदालत विराटनगरबाट अकस्मात् न्यायपरिषद् सचिवालयमा तानिएका पाँच न्यायाधीशको इजलासबाट सुन तस्करी र सनम शाक्य मुद्दाका अभियुक्तहरू थुनामुक्त भएका थिए ।
सुन तस्करी र सनम हत्या प्रकरणमा भएको सो विवादास्पद आदेशपछि न्यायाधीश सारंगा सुवेदी, उमेशकुमार सिंह, उमेशराज पौड्याल, नगेन्द्रलाभ कर्ण र थीरबहादुर कार्की बिहीबार न्यायपरिषद् सचिवालय तानिएका हुन् । उनीहरूलाई उच्च अदालत विराटनगरबाटै सुविधा खाने गरी न्यायपरिषद्को सचिवालयमा काज सरुवा गरिएको छ ।
पाँच न्यायाधीशहरूले सुन तस्करी र सनम शाक्य हत्या अपराधमा जिल्ला अदालत मोरङले पुर्पक्षका लागि थुनामा पठाएका अभियुक्तहरू पूर्वडिआइजी गोविन्द निरौला, एसएसपी दिवेश लोहनी, एसपी विकासराज खनाल, डिएसपी प्रजित केसी, सई बालकृष्ण सञ्जेललगायतलाई सादा तारेखमा र सुन कारोबारीहरू राजकुमार दारुका माधव भनिने मदनप्रसाद घिमिरे, आरेक भनिने राजेन्द्रकुमार शाक्य, विमल पोद्दार, सञ्जय खेतान, माधव सिलवाल, रामकुमार तिवारीलगायतलाई धरौटीमा थुनामुक्त गर्न अन्तिम आदेश दिएका थिए ।
जिल्ला अदालत मोरङले गरेको आदेश बेरितको भन्दै रितपूर्वक आदेश गराउन माग गर्दैै हालसम्म उच्च अदालतमा निवेदन गर्ने सुन तस्करी र सनम शाक्य हत्या अपराधका अभियुक्तमध्ये अझै १३ जनाको हकमा अन्तिम आदेश हुन बाँकी छ ।
६ वटा इजलास भएको उच्च अदालत विराटनगरमा पाँच न्यायाधीश न्यायपरिषद् सचिवालयमा तानिएपछि अब ६ जना न्यायाधीशले कामकाज सम्हालिरहेका छन् । जसमध्ये मुख्यन्यायाधीश कुलरन्त भुर्तेल, हरिप्रसाद बगाले, जनक पाण्डे, साधुराम सापकोटा र ऋषिराम दवाडी र हरिप्रसाद भण्डारी छन् ।
