भरतपुर । नेपालका ५७ वटा जिल्लामा काम गरिसकेको विकासका लागि ग्रामीण कल्याण तथा कृषि सुधार समूह (फरवार्ड नेपाल) को २२ औँ साधारण सभा तथा १० औँ अधिवेशन सम्पन्न भएको छ ।
भरतपुर महानगरपालिकाको क्षेत्रपुरमा सम्पन्न सो अधिवेशनले प्रा.डा.माधवकुमार श्रेष्ठको अध्यक्षतामा नौ सदस्यीय नयाँ कार्यसमिति चयन गरेको छ । आगामी तीन वर्षको कार्यकालका लागि निर्विरोध निर्वाचित सो समितिको उपाध्यक्षमा प्रा.डा.दुर्गा देवकोटा, सचिवमा रामप्रसाद ढुंगाना, कोषाध्यक्षमा सुनिता श्रेष्ठ र सदस्यमा तोया गौतम, प्रवीण पौडेल, डा. दिलिपकुमार झा, सबिता चेपाङ, मैया गिरी रहनु भएको छ ।
भरतपुर महानगरपालिका वडा नं.–२ का अध्यक्ष पूर्णबहादुर श्रेष्ठ प्रमुख अतिथि तथा गैरसरकारी संस्था महासंघ–चितवनका अध्यक्ष सुरेश अधिकारी अतिथिको रुपमा रहनु भएको सो साधारण सभामा कृषि तथा वन विश्वविद्यालयका प्राध्यापक र देशका विभिन्न क्षेत्रबाट आउनुभएका विभिन्न व्यक्तित्वहरुको उपस्थिति रहेको थियो ।
कार्यक्रममा प्रमुख अतिथि, अतिथिका साथै कानूनविद जगन्नाथ भण्डारी एवम् प्राज्ञिक व्यक्तिव प्रा.डा.नवराज देवकोटा लगायतका वक्ताहरुले शुभकामना व्यक्त गर्नुभएको थियो ।
साधारण सभाले आगामी दिनहरुमा फरवार्ड नेपाललाई नयाँ सोच र रणनीतिबाट अगाडि बढाउने निर्णय गरेको छ ।
यस संस्थाले नेपालका ४ लाख २० हजारभन्दा बढी घरधुरीमा विभिन्न क्षेत्रमा आफ्नो सेवा प्रदान गरिसकेकोे जनाएको छ ।
भरतपुरको क्षेत्रपुरमा केन्द्रीय कार्यालय रहेको फरवार्ड नेपालले कृषि, पशुपालन, पुनर्निर्माण, पूर्वाधार विकास लगायत कृषिसम्बन्धी अध्ययन–अनुसन्धानका कामका साथै सामाजिक रुपान्तरणका क्षेत्रमा गैरसरकारी संस्थाको रुपमा विगत २२ वर्षदेखि काम गर्दै आएको छ ।
कार्यक्रममा नवनिर्वाचित अध्यक्ष प्रा.डा.माधवकुमार श्रेष्ठले नवनिर्वाचित कार्यसमितिले संस्थाको उद्देश्य अनुरुप अझ प्रभावकारी ढ·ले संस्थालाई अगाडि बढाउन प्रयत्न गर्ने प्रतिबद्धता प्रकट गर्नु भएको छ ।
