काठमाडौँ । एनएमबि बैंकले ‘बैंक अफ दी एसिया २०२१’ अवार्ड जितेको छ ।
उक्त अवार्ड प्राप्त गर्ने एनएमबि बैंक नेपालको पहिलो बैंक समेत बनेको छ ।
‘द फाइनान्सियल टाइमस’को ‘द बैंकर म्याकेजिन’ले हरेक वर्ष प्रदान गर्ने यो अवार्ड यो वर्षको एसियाकै सर्वोत्कृष्ट बैंकको रूपमा एनएमबि बैंकले प्राप्त गरेको हो ।
प्राप्त सम्मान सार्वजनिक गर्न बैंकले बुधबार आयोजना गरेको पत्रकार सम्मेलनमा बैंकका अध्यक्ष पवन गोल्यानले कर्पोरेट क्षेत्रमा मात्रै नभई फरक बैंकिङ अभ्यास गर्ने क्रममा बैंकले साना तथा मझौला उद्यमी, कृषि क्षेत्र, ऊर्जा जस्ता क्षेत्रमा गरिएको लगानी, चुस्त व्यवस्थापन, पारदर्शी बैंकिङ अभ्यास जस्ता बलिया आधारका कारण बैंक एसियाकै सर्वोत्कृष्ट बन्न सकेको बताए ।
एनमबि बैंकका सीईओ सुनिल केसीले एसियाका ४८ मुलुक मध्येको सर्वोत्कृष्ट बैंक बन्नु सबैको जित भएको बताउँदै खुसी व्यक्त गरे।
‘बैंकमात्र होइन‚ नेपाल र नेपाल राष्ट्र बैंकको जित हो,’ उनले भने, ‘एनएमबि बैंकले पाएको यो सम्मान नेपालकै लागि गौरवको विषय हो ।’ यो सम्मानले आगामी दिनमा बैंकलाई विश्वकै सर्वोत्कृष्ट बैंक बनाउन थप जिम्मेवारी सुम्पिएको उनको भनाई छ ।
