सिमरा । पूर्वप्रधानमन्त्री एवम् नेकपाका वरिष्ठ नेता माधवकुमार नेपालले दोस्रो अन्तर्राष्ट्रिय विमानस्थलको काम कुनै बहानाले ढिलाई गर्न नहुने बताएका छन्। नेपालले कामलाई बाधा पुर्याउने गरी अब कसैले पनि बहाना बनाउन नहुने बताए ।
अन्तर्राष्ट्रिय विमानस्थल निर्माण सरोकार समन्वय समिति बाराले आइतबार निजगढमा आयोजना गरेको अन्तर्राष्ट्रिय विमानस्थल निर्माण प्रतिवद्धता कार्यक्रममा बोल्दै नेपालले विमास्थलको निर्माणको कामलाई विना अवरोध अघि बढाउनुपर्ने कुरामा जोड् दिए । पछिल्लो समय विमानस्थलको विषयलाई लिएर बाहिर आएका प्रचारबाट सचेत हुनुपर्ने भन्दै नेता नेपालले अहिलेसम्म भएका कामका प्रगतिले प्रस्ताव गरेकै स्थानमा विमानस्थल बन्नेमा अब दुईमत नरहेको बताए।
अब विमानस्थलको कामलाई रोक्ने किसिमका गतिविधि कसैले नगरौँ, यो आयोजना देशको समृद्धिसँग जोडिएको छ, नेकपाका नेता नेपालले भने,तीनै तहका सरकार र नागरिकले गम्भीरताका साथ यो आयोजना सम्पन्न गर्न लाग्नुपर्छ।
नेपालले आयोजनास्थलमा पर्ने टाँगिया बस्ती सार्ने प्रक्रिया थालिएको भन्दै जितपुर सिमरा उपमहानगरपालिका– १६ मा पर्ने टाँगिया बस्तीलाई सोही वडाको पिलुवा, वडा नं १७ को रामनगर हरैया र कोल्हवी नगरपालिकाको उत्तर तामागढी क्षेत्रमध्ये एक ठाउँमा सारिने बताए ।
विमानस्थल कस्तो प्रणालीबाट निर्माण गर्ने भन्ने विषयमा अन्तिम गृहकार्य भईरहेको भन्दै नेता नेपालले राज्यलाई प्रत्यक्ष फाइदा पुग्ने प्रणालीमा अघि बढ्न सुझाव दिए।
