काठमाडौँ । सांसद विमला विकले महिलाहरु स्यानिटरी प्याड निशुल्क वितरण गर्नुपर्ने बताएकी छन् । उनले महिनावारी भएका बेला प्रयोग गर्ने प्याडमा सबैको पहुँच नपुगेको भन्दै प्याडलाई निशुलक गर्न माग गरेकी हुन् ।
बुधबार संसदमा छाउपडी प्रथा अन्त्यसम्बन्धी जरुरी सार्वजनिक महत्वको प्रस्तावमा छलफल गर्दै उनले भनिन्, ‘यो महिला मात्रैलाई हुने छाउ वा महिनावारी महिला मात्रैको सरोकारको विषय हो कि समाजको ? यो महिला मात्रैको सरोकारको विषय हो कि सरकारको सरोकारको विषय हो ? यसमा सरकारले विशेष ध्यान दिनुपर्छ कि पर्दैन ? सरकारको यसमा संवेदनशीलता हुनु पर्छ कि पर्दैन ? हामीले हाम्रा शौचालयहरूमा कण्डमलाई फ्रि बनाएका छौं। तर महिलाले महिनावारी हुँदा प्रयोग हुने कटनका टुक्रा वा प्याडलाई फ्रि गराउन सक्यौं कि सकेनौं ? हाम्रो संसदको महिला शौचालय, त्यहाँ प्याडको व्यवस्था छ ? छैन । हामी महिलाहरू पनि त यो संसदमा माननीय भएर बसिरहेका छौं । हाम्रो संवेदनशीलता खै ?’
यता,सांसदहरू रंगमती शाही, नरबहादुर धामी र लालबहादुर थापाले प्रस्तावको समर्थन गर्दै छाउपडी कुप्रथाबाट मुलुकलाई मुक्त गर्न केन्द्रीयस्तरदेखि स्थानीय तहसम्म विशेष महाअभियान सञ्चालन गर्नुपर्ने आवश्यकता औंल्याए।
उनीहरूले विद्यालयस्तरमा सामाजिक विभेदविरूद्ध पाठ्यक्रम बनाएर लागु गर्नुपर्ने, छाउपडीविरूद्ध जनचेतनामूलक कार्यक्रम व्यापक पार्नुपर्ने, छाउगोठमा राख्ने घरपरिवारलाई स्थानीय सुविधाबाट बञ्चित गर्नुपर्ने लगायत माग गरे। सांसदहरूले महिला केन्द्रित विकासका कार्यक्रम सञ्चालन गर्न पनि माग गरे।
सांसद आशा कुमारी विकले छाउपडीको अन्त्यका लागि सोचमा परिर्वतन हुनुपर्ने भन्दै केन्द्रदेखि स्थानीय तहसम्म महाअभियान सञ्चालन गर्नुपर्ने बताइन्। उनले भनिन्, ‘झुपडी परिर्वतन गर्नु होइन खोपडी परिर्वतन गर्नुछ। त्यसैले खोपडी परिवर्तन गर्न सहज छैन।’
