हरारे । खेल सुरु हुनुभन्दा अगाडि रंगशाला प्रवेश गर्न दर्शकबीच खिचातानी हुँदा एक समर्थकको मृत्यु भएपछि ‘अफ्रिका कप अफ नेसन्स’ फुटबल प्रतियोगितामा जिम्बाबेको छनोट ओझेलमा परेको छ ।
हरारेस्थित राष्ट्रिय रंगशालामा जिम्बाबे र कंगो—ब्राजाभिलबीच समूह ‘जी’ को अन्तिम छनोट खेल हुने कार्यक्रम थियो । सोही खेल हेर्न दर्शकको ओइरो लागेपछि भागदौडमा एक समर्थकको निधन भएको जिम्बाबे फुटबल संघले जनाएको छ । समर्थकको निधन भए पनि ‘अफ्रिका कप अफ नेसन्स’ को छनोट खेल भने अगाडि बढाइएको थियो ।
उक्त खेलमा २—० गोलले विजयी हुँदै जिम्बाबे सन् २०१९ मै इजिप्टमा आयोजना हुने ‘अफ्रिका कप अफ नेसन्स’ का लागि छनोट भएको छ । समर्थकको मृत्युको विषयमा प्रहरीले अनुशन्धान गरिरहेको समाचारमा जनाइएको छ । जिम्बाबे फुटबल संघले समर्थकको निधनप्रति दुःख ब्यक्त गरेको छ । निधन भएका समर्थकको नाम भने खुलाइएको छैन ।