काठमाडौँ । ललितपुरको नख्खुमा रहेको एनसेलको कार्यालय अगाडि विष्फोट गराउने ४ जना पक्राउ परेका छन् । पक्राउ पर्ने नेत्रविक्रम चन्द नेतृत्वको प्रतिबन्धित विप्लव समूहका कार्यकता रहेका छन् । दुई जना अझै फरार छन् ।
प्रहरी प्रधान कार्यलयका अनुसार पक्राउ पर्नेमा डिकेन्द्र राई,सूर्य भुजेल, रामृकष्ण खतिवडा र शिव धिमाल रहेका छन् । भुजेल विप्लवका पूर्वअंगरक्षक भएको स्रोतले बताएको छ । फरार रहेका दुई जनाको पनि प्रहरीले पहिचान गरिसकेको स्रोतले बताएको छ ।
एनसेल मुख्यालयमा विष्फोट हुनुअघि तीन वटा मोटरसाइकमा गएका ६ जना मध्ये ४ जना पक्राउ परेको प्रहरीले दाबी गरेको हो ।प्रहरीका अनुसार सीसी टीभीले सबैलाई पहिचान गरेको हो ।
एनसेल मुख्यालय अगाडि गत फागुन ११ गते विष्फोट गराइएको थियो ।घटनामा परी गम्भीर घाइते भएका ३ जनामध्ये ललितपुर भैंसेपाटी बस्ने लमजुङ मेलुङका ४९ वर्षीय सिंहप्रसाद गुरूङको मेडिसिटी अस्पतालमा उपचारको क्रममा मृत्यु भएको थियो ।
घटनालगत्तै विप्लव समूहका मध्यकमाण्ड इञ्चार्ज हेमन्तप्रकाश ओली सुदर्शनले सञ्चारमाध्यमहरुसँग कुरा गर्दै घटनाको जिम्मेवारी लिएका थिए । उनलाई पनि प्रहरीले शनिबार काभ्रेबाट पक्राउ गरिसकेको छ ।
सुदर्शनसहित अन्य ४ जना विरुद्ध विष्फोटक पदार्थ, संगठित अपराध र राज्यविरुद्धको कसुर अन्तरगत मुद्दा चलाइएको छ ।