काठमाडौँ । पछिल्ला ६ महिनामा अमेरिकी डलरको तुलनामा नेपाली मुद्रा (नेरु) बलियो बन्दै गएको छ । विश्वबजारमा अमेरिकी डलरप्रतिको आकर्षणमा कमी आएसँगै नेरु बलियो देखिन थालेको हो ।
मंगलबारका लागि राष्ट्र बैंकले एक अमेरिकी डलरको विनिमय दर १ सय १० रुपैयाँ ६० पैसा तोकेको छ । यसअघिको उच्च विनिमय दरको तुलनामा मंगलबारका लागि नेरु करिब साढे आठ प्रतिशत विन्दुले बलियो भयो देखिएको छ ।
करिब ७ महिनाअघि (०७५ असोज २४ मा) अमेरिकी डलरको विनिमय दर १ सय २० रुपैयाँ हाराहारीमा थियो । यसअघि ०७५ साउन २७ मा डलरको विनिमयदर १ सय १० रुपैयाँ ४३ पैसा थियो ।
अमेरिकी डलरको तुलनामा भारु बलियो भएपछि नेरु पनि बलियो बनेको हो । नेरु र भारुबीच स्थिर विनिमय दर छ ।
पछिल्लो समयमा अमेरिकाको अर्थतन्त्रमा उल्लेख्य सुधार हुन नसकेको कारणले लगानीकर्तामाझ डलरको आकर्षण घटेको छ ।