काठमाडौं । सर्वोच्च अदालतले विप्लव नेतृत्वको नेकपाका स्थायी समिति सदस्य हेमन्त प्रकाश ओलीलाई तीन दिनभित्र सर्वोच्च अदालतमा उपस्थित गराउन सरकारलाई निर्देशन दिएको छ ।
प्रहरीले अघिल्लो साता काभ्रेबाट पक्राउ गरेको थियो । ओलीलाई प्रहरीले पक्राउ परेपछि छोरी विपना ओलीले बुधबार सर्वोच्चमा बन्दी प्रत्यक्षीकरणको रिट दायर गरेकी थिइन् ।
रिटमा प्रारम्भिक सुुनुवाई गर्दै प्रधानन्यायाधीश चोलेन्द्रशम्शेर जबराको एकल इजलासले बन्दी बनाउनुको कारणसहित तीन दिनभित्र अदालतमा उपस्थित गराउन आदेश दिएको हो ।
विप्लव नेतृत्वको नेकपामा मध्य कमाण्ड इन्चार्ज ओलीसहित ९ जनालाई प्रहरीले चैत ९ गते काभ्रेको खानीखोला–७, मिल्चेबाट पक्राउ गरेको थियो ।
उनी काठमाडौं आउँदै गर्दा बा १७ च ४८९३ नम्बरको स्कर्पियो जीपबाट पक्राउ परेका हुन् । उनीमाथि संगठित अपराधको मुद्दामा अनुसन्धान गर्न प्रहरीले जिल्ला अदालत ललितपुरबाट ८ दिनको म्याद लिएको छ । राजधानी दैनिकमा खबर छ ।
