काठमाडौं । इन्डियन प्रिमियर लिग (आइपीएल) क्रिकेट अन्तर्गत मंगलबार राती भएको २३ औं खेलमा चेन्नई सुपर किंग्सले कोलकता नाइट राइडर्सलाई ७ विकेटले पराजित गर्दै शीर्षस्थान ओगेट्न सफल भएको छ ।
कोलकताले दिएको १ सय ९ रनको झीनो लक्ष्य चेन्नईले १७.२ ओभरमा ३ विकेटको क्षतिमा पुरा गर्दै जित बनाएको हो । कोलकत्तालाई सामान्य लक्ष्यमा राख्न दीपक चाहरले राम्रो भुमिका निभाए । उनले २० रन दिएर तीन विकेट लिए ।
चेन्नईको जितमा फाफ डु प्लेसिसले ४५ बलमा ३ चौका सहित ४३ र केदार जाधव ८ रनमा अविजित रहे ।
ओपनर शेन वाटशनले ९ बलमा २ चौका र १ छक्का प्रहार गर्दै १७ रनको योगदान दिए । उनलाई दोस्रो ओभरको दोस्रो बलमा पियुष चवलाले क्याच आउट गरे ।
पाँचौ ओभरमा सुनिल नारायणको अन्तिम बलमा सुरेश रैनाले प्रहार गरेको बललाई चवलाले क्याच गर्दै सुरेशलाई १४ रनमा सिमित गरे ।
आम्बाती रायडू २१ रनमा आउट भए । कोलकताका लागि सुनिल नारायणले २ र पियुष चवलाले १ विकेट लिन बाहेक अन्य कुनैपनि बलरले विकेट लिन सकेनन् ।
त्यसअघि चेन्नईमा टस हारेर ब्याटिङमा उत्रिएको कोलकाताका लागि आन्द्रे रसेलले ५० रन प्रहार गरे। नटआउट रहेका रसेलले उक्त रन हासिल गर्न संघर्ष गर्नुपरेको थियो।
कोलकाताका दोहोरो अंकमा रन जोड्ने अन्य दुई खेलाडीमा दिनेश कार्तिक १९ र रोबिन उथप्पा ११ रहेका थिए। कोलकाताका चार खेलाडी शून्यमा आउट भएका थिए।
चेन्नईका बलर दिपक चाहरले ४ ओभरमा २० रन खर्चेर ३ विकेट लिए । इमरान ताहिरले ४ ओभरमा २१ रन खर्चेर २, हरभजन सिंहले ४ ओभरमा १५ रन खर्चेर २ र रविन्द्र जेडेजाको नाममा १ विकेट रह्यो ।
