काठमाडौं । पेरिस सेन्ट जर्मेन (पीएसजी) हराउँदै रेनसले फ्रेन्च कपको उपाधि जितेको छ ।
शनिबार राति आफ्नै घरेलु मैदानमा भएको खेलमा रेनसले पेनाल्टी सुटआउटमा पीएसजीलाई ६–५ ले जित हात पारेको हो ।खेलको १३औं मिनेटमा नै ड्यानी अल्भेसले गोल गर्दै पीएसजीलाई अग्रता दिलाएका थिए । खेलको २१ औ मिनेटमा नेयमारले गोल गर्दै पीएसजीलाई दोब्बर अग्रता दिलाए ।
तर खेलको ४० औ मिनेटमा पीएसजीका प्रिन्सेल किम्पेम्बेले आत्मघाति गोल गरेपछि रेनसले २–१ गोलको स्थितिमा ल्याएको थियो । ६६औं मिनेटमा सिटोइले गोल गर्दै २–२ मा ल्याए ।
बाँकी समयमा दुबै टिमबाट गोल हुन नसकेपछि ३० मिनेटको समय थप गरिएको थियो । यही थप गरिएको समयमा किलियन एम्बाप्पेले रेड कार्ड खादै मैदान छाडेका थिए । थप गरिएको समयमा पनि गोल हुन नसकेपछि खेल पेनाल्टीबाट छिनोफानो भएको हो ।
