काठमाडौँ । च्याम्पियन्स लिग अन्तर्गत सेमिफाइनलको पहिलो लिगमा डच क्लब अयाक्सले टोटनह्यामलाई पराजित गरेको छ ।
गएराती टोटनह्यामको घरेलु मैदानमा सम्पन्न खेलमा अयाक्सले टोटनह्यामलाई १-० गोल अन्तरले पराजित गरेको हो ।
खेलको एक मात्र गोल डोनी भान डे बीकले खेलको १५औ मिनेटमा गरेका हुन् । बीकको एक मात्र गोल पछि आयाक्स सन् १९९६ पछि पहिलो पल्ट फाइनलमा पुग्न एक कदम अगाडी बढेको छ । अयाक्स यसअघि सन् १९९६ र १९६९ मा च्याम्पियन्स् लिगको फाइनलमा पुगेको थियो ।
यस सिजनमा रियल म्याड्रिड र युभेन्टस जस्ता फुटबलका महारथी क्लबलाई च्याम्पियन्स लिगबाट बाहिर पठाएको अयाक्सले अब टोटनह्यामलाई पनि पराजित गर्ने तयारी गरेको छ ।
यस खेलमा १-० को जीतबाट अयाक्सले अग्रता मात्र हासिल गरेको छैन अवे गोलको महत्वपूर्ण फाइदा समेत हासिल गरेको छ ।
च्याम्पियन्स लिगको इतिहासमा यसअघि १७ टिम मध्ये केवल एक टिम सेमिफाइनलको पहिलो लिगमा पराजित भएर फाइनलमा पुगेको रेकर्ड रहेको छ ।
अयाक्सका दुसन ताडीकले यस खेलमा ३२ गोल गर्ने मौका सिर्जना गरेका थिए जुन यस बर्षको च्याम्पियन्स लिगमा कुनै पनि खेलाडीले बनाएको गोल गर्ने धेरै मौका हो ।
अब दुवै टिमबीचको दोस्रो लिग अर्को बिहिबार मे ९ मा अयाक्सको घरेलु मैदानमा हुने छ ।
