काठमाडौं । अस्ट्रेलियाका प्रधानमन्त्री स्कट मरिसनका टाउकोमा अण्डा प्रहार गरिएको छ । न्यु साउथ वेल्सको अबलरीमा चुनावी अभियानका क्रममा रहेका मरिसनले महिलाहरूसँग कुरा गरिरहेका बेला एक युवतीले टाउकोमा अण्डा प्रहार गरेकी हुन् ।
सञ्चारमाध्यमद्वारा सार्वजनिक भिडियोमा मरिसनलाई प्रहार गरिएको अण्डा नफुटी उछिट्टिएको देखिन्छ । त्यस लगतै भुईँमा खसेको अण्डा घटनास्थलमा रहेका पत्रकारले नफुटेकै अवस्थामा टिपेर देखाएका थिए ।
अण्डा प्रहार गर्ने २५ वर्षीय युवतीलाई प्रहरीले नियन्त्रणमा लिएको छ ।
प्रधानमन्त्री मरिसनले आफूमाथिको आक्रमण ‘कायर’ कदम भएको टिप्पणी गरेका छन् । उनले आक्रमण गर्ने युवतीलाई तत्काल नियन्त्रणमा लिएको भन्दै सुरक्षाकर्मीको प्रशंसा गरे ।
मरिसन अण्डा प्रहारको सिकार हुने यसवर्षका पहिलो अस्ट्रेलियाली राजनीतिकर्मी हुन् । यसअघि गत मार्चमा सिनेटर फ्रासर एनिङलाई एक युवाले अण्डाले हानेका थिए । अण्डा प्रहार गर्ने १७ वर्षीय युवालाई प्रहरीले सचेत गरेर छाडेको थियो ।
