बाँके । पछिल्लो समय भूमाफिया निकै सक्रिय भएका छन्। कानुनीराजको नै उपहास हुने गरी भूमाफिया सक्रिय भइरहँदा बाँके पनि अछुतो रहन सकेन। भूमाफिया र मालपोत कर्मचारीको मिलेमतोमा सरकारी जग्गा व्यक्तिका नाममा नामसारीका खबर सार्वजनिक भइरहेका बेला बाँकेमा एक कानुन व्यवसायीले झुक्याएर एक महिलाको जग्गा आफ्नो नाममा दर्ता गराएको तथ्य खुलेको छ।
डुडुवा गाउँपालिका–२ बेतहनीकी उषा कुर्मीको एक बिगाहा १५ कठ्ठा चार धुर जग्गा उच्च अदालत बार एशोसिएशन बाँकेका अध्यक्षसमेत रहेका कानुन व्यवसायी विकास आचार्यले आफ्नो नाममा गराएको पीडितले बताएकी छन्। बेतहनीकै नान भन्ने दुर्गाप्रसाद बर्मा, रामबहादुर बर्मा र आशाराम बर्माको मिलेमतोमा कानुन व्यवसायी आचार्यले उषाको करोडौं मूल्यको जग्गा आफ्नो नाममा गराएको पीडित कुर्मीको भनाइ छ।
उषाकी आमा लामो समयदेखि पायल्सको बिरामी छिन्। छिमेकी दुर्गा, राम र आशारामले जग्गा विक्री गरेर उपचार गराइदिने बताएपछि उषाले उनीहरूकै पहलमा आचार्यलाई दुई कठ्ठा साढे चार धुर जग्गा रु दुई लाख ५० हजारमा विक्री गरेकी थिइन्।
उषा लेखपढ गर्न नजान्ने भएपछि जग्गा पास गर्ने क्रममा रु २५ लाखमा एक बिगाहा १५ कठ्ठा चार धुर जग्गा विक्री गरेको सहीछाप गराएर करोडौं मूल्यको जग्गा झ्वाम पारिएको हो।
सो जग्गा उषाका बुवा जगदीशले यसअघि नै छोरीको नाममा नामसारी गरिदिएको बताए। उषाको नाममा रहेको कित्ता नं १८, २४, २०, ३१, ३२, ९८, १०८, १३२, १४४, १४९ र ५०८ गत २०७४ मङ्सिर १८ गते विकास आचार्यको नाममा पास भएको छ । दुर्गा, राम र आशारामले जग्गा विक्री गराइदिएपछि उषाकी आमालाई उपचार गराइदिन्छौं भन्दै उषा र उनका बुबालाई भारतमा लगेर करिब छ महिना उनीहरूले बन्धक बनाएको पीडितले बताइन्।
‘चिकित्सक आउँछ भन्दै हामीलाई एउटा घरमा बन्धक बनाइयो, तर चिकित्सक पनि आएनन् । ममाथि दुर्गा र रामले पटक–पटक बलात्कारसमेत गरें’, जसोतसो त्यहाँबाट भागेर वैशाख १० गते बेतहनी आएकी उषाले भनिन्, ‘भागेर ज्यान जोगायौं। घर आउँदा आफ्नो घरजग्गाको आम्दानी सोधखोज गर्दा, यो जग्गा तिम्रो होइन, विक्री भइसक्यो भनेर छिमेकीले भनेपछि आफू छाँगाबाट खसेजस्तै भएँ।’
अहिले उषा आफ्ना वृद्ध बुबाआमासँगै न्याय खोज्दै अड्डा अदालत र प्रहरी प्रशासन धाइरहेका छन्।
तर, कानुन व्यवसायी आचार्यले प्रक्रिया पुर्याएर आफूले खरिद गरेको बताए। सो जग्गा पहिले पनि अदालतमा रोक्का भएको र पछि आफूले पैसा बुझाएर फुकुवा गरी खरिद गरेको उनले बताए।
‘पीडितलाई पीरमर्का परेको भए, बसेर मिलाउन सकिन्थ्यो’, उनले भने, ‘तर अहिलेसम्म पीडित मसँग आउनुभएको छैन । यो मेरो पेशागत व्यवसायलाई धमिल्याउने खेल भएको छ।’
केही दिनअघि आचार्यकै ल फर्मबाट अख्तियारले रु तीन लाख घूससहित उच्च अदालत नेपालगञ्जका टाइपिष्ट नायबसुब्बा कृष्णकुमार पाठकलाई पक्राउ गरेको थियो ।
