हेटौंडा । प्रमुख प्रतिपक्षी दल कांग्रेसले प्रदेशको नाम र राजधानीको विषयले प्रवेश नपाएको भन्दै वर्षे अधिवेशन अवरुद्ध गरेको छ ।
प्रदेश ३ को आजबाट सुरु हुन लागेको अधिवेशनमा नामाकंन र राजधानीबाहेकका ८ विषयले मात्रै बैठकमा प्रवेश पाउने भएपछि प्रदेश सभा पहिलो पटक अवरुद्ध गरेका हुन् ।
राजधानी र नामांकरणको विषय नटुङ्ग्याएसम्म संसद चल्न नदिने भन्दै नेपाली कांग्रेसले ३ नम्बर प्रदेश सभा अवरुद्ध गरेको कांग्रेस संसदीय दलका नेता इन्द्र बानियाले बताए।
यसअघि हिउँदे अधिवेशनमा राजधानीको विषयले प्रबेश नपाए वर्षे अधिवेशन अवरुद्ध गर्ने प्रमुख प्रतिपक्षी दलले चेतावनी दिएको थियो ।
दलका नेताले वर्षे अधिवेशनको शुभकामना मन्तव्य व्यक्त गरेपछि कांग्रेसले संसद अवरुद्ध गरेको हो। सत्तारुढ दल नेकपामै पनि राजधानी र प्रदेश नामांकनबारे सहमति जुट्न नसक्दा प्रदेश नामांकन र स्थायी राजधानी अझै टुंग्याउन सकेको छैन । प्रतीपक्षी दल नेता बानियाँले प्रदेश नामांकन र राजधानीले अलमलको स्थिति सिर्जना भएकाले छिटो टुंग्याउन आफ्नो पार्टीले दबाव दिन लागेको बताए ।
यसअघि प्रदेश ३ संसदले हिउँदे अधिवेशनको अन्त्यसम्म राजधानी र नामाकरणको विषय टुङ्ग्याउने बताएको थियो । तर, बर्षे अधिवेशनमा पनि यसलाई प्राथमिकताको १० औं नम्बरमा राखिएको भन्दै कांग्रेसले आपत्ति जनाएको छ ।
नेपाली कांग्रेसले संसद अवरुद्ध गरेपछि मंगलबार ११ बजे सम्मका लागि संसद स्थगित गरिएको हो।
