काठमाडौं । नेपाल ल क्याम्पसमा बिएएलएलबी पाँचौँ वर्षमा अध्ययनरत एक विद्यार्थी विदेश जाने भएपछि त्रिभुवन विश्वविद्यालयको परीक्षा तालिका नै सार्ने तयारी भएको छ ।
आगामी २७ जेठबाट नियमित रुपमा संचालन हुने परीक्षा तालिका नै सार्न परीक्षा नियन्त्रण कार्यलय बल्खुलाई सिफारिस गरिएको हो ।
क्याम्पस प्रमुख डा. डिएन पराजुलीले एक विद्यार्थी भए पनि सकेसम्म परीक्षा नछुटोस् भनेर बल्खुलाई पत्राचार गरेको बताए । ‘एकजना विद्यार्थी भए पनि हाम्रै विद्यार्थी हुन्, सकेसम्म परीक्षा मिस नहोस् भनेर पत्र लेखिएको हो, बल्खुले के गर्छ थाहा छैन,’ क्याम्पस प्रमुख पराजुलीले भने ।
स्रोतका अनुसार सोहि कलेजमा अध्यापन गरारहेकी नेपाल कम्युनिष्ट पार्टी (नेकपा) निकट बिष्णुमाया भुसालकी छोरी आफैँले खोजेको कार्यक्रमका लागि विदेश जान क्याम्पसले सिफारिसपत्र दिएको थियो । तर, सोहि मितिमा उनकी छोरीको परीक्षा परेपछि आर्थिक क्षति हुनेभन्दै क्याम्पस प्रमुखलाई बल्खुमा पत्राचार गर्न लगाएकी हुन् ।
यता,केही विद्यार्थीले भने क्याम्पस प्रमुख पराजुलीलाई भेटेर परीक्षा नसार्न दबाब दिएका छन् । विद्यार्थीको काम र मानसिक रूपमा समेत असर पर्ने भन्दै उनिहरुले परीक्षा नसार्न आग्रह गरेका हुन् ।
हाल बिएएलएलबी पाँचौँ वर्षमा नेपाल ल क्याम्पसमा मात्र एक सय पाँच विद्यार्थी अध्ययनरत छन् । देशभर त्रिविका तीन कलेजमा बिएएलएलबीको कक्षा सञ्चालन भइरहेको छ ।
