बुटवल । केही दिनअघि पूर्व पश्चिम राजमार्गअन्तर्गत टिकौलीमा रहेको सडक बोर्डको कर उठाउने ढाटमा सुरक्षा दिन खटिएका प्रहरीमाथि नै पेट्रोल छर्किएर सख्त घाइते बनाउने समूह मध्येका तीन जनाविरुद्ध मंगलवार म्याद थप भई मुद्दा अघि बढाइएको छ ।
जेठ ३ गते भरतपुर महानगरपालिका टिकौली गोन्द्राङस्थित कर संकलन केन्द्र (ढाट) राख्ने विषयमा भएको तोडफोड र आगाजानी घटनामा शान्ति सुरक्षा प्रदान गर्न गएको प्रहरी टोली मध्येकी प्रहरी सहायक निरीक्षक कल्पना खड्का को शरीरमा आक्रोशित भीडबाट कसैले पेट्रोल छर्किँदा उनी जलेर सख्त घाइ ते भएकी थिइन् ।
जिल्ला प्रहरी कार्यालय चितवनका प्रहरी नायब उपरीक्षक दीपेन्द्र शाहका अनुसार शुक्रबार प्रदेश सांसदकै उपस्थितिमा बिहान ११ बजेको समयमा ३०–४० जनाको समूहले पेट्रोल छर्किएर आगो लगाउदा डिउटीमा खटिएकी खड्काको हात, खुट्टा, शरीर र टाउकामा आगोले पोलेको छ ।
पहिलो दिन प्रहरीले ढाटमा आगो लगाएको आरोपमा प्रहरीले रेवान सौराहाका अध्यक्ष गोकर्ण गिरीलाई पक्राउ गरेको थियो भने दोस्रो दिन कृषि विकास बैंक कर्मचारी यूनियनका पूर्वअध्यक्ष केपी लामिछाने र खिलप्रसाद घिमिरेलाई पक्राउ गरिएको थियो ।
। चितवनका प्रमुख जिल्ला अधिकारी जितेन्द्र बस्नेतका अनुसार पछि भिडियो हेरेर चिने पछि थप दुई जनालाई पक्राउ गरिएको छ । सोमबार तीन जना विरुद्ध अभद्र ब्यवहार अन्तर्गत मुद्धा दर्ता गरी मंगलवार म्याद थप समेत भएको प्रमुख जिल्ला अधिकारी बस्नेतले बताए ।
ढाट राख्दा वन्यजन्तुलाई समेत असर पर्ने र पुर्वी चितवनका जनताका साथै राष्ट्रिय निकुञ्जलाई समेत प्रत्यक्ष असर पर्ने भएकोले ढाट अन्यत्रै सार्नु पर्ने माग गर्दै पुर्वी चितवनका जनता आन्दोलित भएका थिए ।
प्रहरीलाई आगो लगाउने घटना स्थानीय प्रशासनले सहमतिमा मिलाउन खोजेको आरोप समेत आइरहेको प्रति प्रमुख जिल्ला अधिकारी बस्नेतको ध्यानाकर्षण गराउँदा उनले आगो लगाउने विरुद्ध कारबाही गर्ने गरी अगाडि बढिएको तर ढाट सार्ने विषयमा सहमति गर्दा ढिलाई हुन गएको प्रतिकृया दिए ।
