काठमाडौं । वर्षायामको सुरुआतसँगै काठमाडौँमा सरुवा रोगको प्रकोप पनि बढेको पाइएको छ । यस्तो रोगको जोखिम बढ्न सक्ने भएकाले चिकित्सकले सतर्क रहन सुझाएका छन् । वर्षायाममा खासगरी पानीका कारण झाडापखाला, टाइफाइट र जन्डिसजस्ता रोगको जोखिम बढ्नसक्ने देखिएको छ ।
शुक्रराज ट्रपिकल तथा सरुवा रोग अस्पताल टेकुका विशेषज्ञ शेरबहादुर पुनले अरु सामान्य समयभन्दा वर्षा र गर्मीको समयमा सरुवा रोगको जोखिम बढी हुने बताए । पानीको शुद्धता र खानेकुरामा सावधानी अपनाउन पर्ने उनको सुझाव छ ।
वर्षा याममा पानीका मुहान दूषित हुने र त्यस्तो पानी निर्मलीकरण नगरी प्रयोग गर्दा विभिन्न रोग देखापर्ने डा. पुन बताउँछन् । झाडापखाला, टाइफाइट स्क्रब टाइफस, जन्डिसलगायतका रोग पानीजन्य समस्याबाटै लाग्ने गर्दछ ।
राजधानी तथा बाहिरतिर सर्पदंशको समस्या पनि उत्तिकै देखिन थालेको छ । सर्पदंश रोग नभए पनि गर्मीको समयमा यसको समस्या लिएर अस्पताल आउने मानिसको संख्या बढ्ने डा.पुन बताउँछन् ।
स्क्रब टाइफस मुसामा लाग्ने एक प्रकारको किर्नाजस्तै ‘माइट’ नामक संक्रमित हो । यस जीवाणुले टोकेमा यो रोग लाग्छ । मानिसबाट मानिसमा नसर्ने यो रोग मुसाको एक प्रकारको तरल पदार्थ खाएर अघाएपछि माइट जातको किर्ना झारमा झर्छ ।
त्यसैले यस मौसममा खासगरी खानेपानी र खानेकुरामा विशेष ध्यान दिनुपर्छ । यो मौसममा विशेषगरी पेट दुख्ने, दिसामा रगत देखिने, ज्वरो आउने, शरीर थाक्ने, कुनै पनि खानेकुरा खान मन नलाग्ने हुन्छ । यदि यस्तो महसुश शरीरलाई भएमा तुरुन्त स्वास्थ्य केन्द्र या अस्पताल जानुपर्र्ने चिकित्सक बताउँछन् ।
