नयाँदिल्ली । भारतको मध्यप्रदेशस्थित सनवलीकेधा गाउँमा १ सय जना भन्दा धेरै स्थानीय बासिन्दाले २५ जनालाई डोरीमा बाँधेर कान समात्दै ‘गौ माताकी जय’ नारा लगाउन लगाएका छन् ।
गाउँलेका अगाडि ती २५ जनाले डोरीमा बाँधिएर कान समात्दै ‘गौ माताकी जय’ नारा लगाएका छन् । यस्तो भिडियो भारतीय मिडिया ‘एएनआई’ले सार्वजनिक गरेको छ । जहाँ गाउँलेले उनीहरुलाई प्रहरी स्टेशनबाट २ किलोमिटर परबाट दण्डस्वरुप पैदलयात्रा समेत गराएका थिए ।
गाईलाई किनबेच गरेको भन्दै उनीहरुलाई यहाँका गाउँलेले सार्वजनिक रुपमै यस्तो यातना दिएका हुन् । यस्तो घटनासँगै प्रहरीले भीडका तीनजनालाई नियन्त्रणमा लिएको छ । भारतीय मिडिया ‘इन्डियन एक्सप्रेस’का अनुसार ती तीनजना बजरंग दलका कार्यकर्ता हुन् ।
उक्त घटना खन्द्वा सहरबाट ६० किलोमिटर परको गाउँमा भएको हो । सामाजिक संजालमा भाइरल नै भएको उक्त भिडियोमा गाउँलेले हातमा लठ्ठी लिएर यातना दिएको पनि देखाइएको छ । २५ जना पीडितमध्ये सातजना महिला छन् । जो मुस्लिम समुदायको रहेको पनि खुलेको छ ।
