समुद्रमाथि ३९ हजार फिटको उचाइमा युएफओको ताँती

वासिङ्टन । हालसम्म एलियनहरूका बारेमा धेरै दावी गरिएका छन् तर यी दावीमध्ये कुनै पनि पुष्टि भएको छैन। धेरैजसो दावी एलियन देखेको गरिन्छ । हालै एक अमेरिकी सैन्य पाइलटले एलियन देखेको भन्दै प्रमाणका रुपमा भिडियो जारी गरेका छन् । सैनिक पाइलटले साउथ चाइना सीको माथि आकाशमा देखिएको चिजलाई युएफओ भन्दै भिडियोलाई सामाजिक सञ्जालमा साझा गरेका छन् । 

इन्डिपेन्डेन्टको रिपोर्ट अनुसार उक्त भिडियो नोभेम्बर २४ मा रेकर्ड गरिएको थियो । अमेरिकी मिलिट्री न्युजले यसलाई डिसेम्बर ४ मा युएफओ ट्र्याकिङ वेबसाइटमा राखेको थियो । भिडियोमा पाइलटले भनेको सुनिन्छ, ‘मलाई थाहा छैन यो के हो, यो कुनै अनौठो चिज हो ।’ भिडियोको अन्त्यमा यो चम्किलो चीज बादलमा हराउँछ जसलाई पाइलट भन्छन्, ‘गयो ।’

रिपोर्टअनुसार भिडियो रेकर्ड गर्दा ती चिजहरु समुद्रभन्दा ३९ हजार फिटको उचाइमा थिए । ५३ सेकेन्डको भिडियोमा चारवटा बत्तीको तीन समूह बादलमाथि लाइनमा उडिरहेको देख्न सकिन्छ। यो सामान्य विमान जस्तो देखिँदैन। यसलाई मङ्गलबार ChillzTV ले ट्वीटरमा सेयर गरेको थियो, जसमा मानिसहरुले फरक फरक मत दिएका छन् । एक ट्विटर प्रयोगकर्ताले लेखेका छन्, ‘पहिलो हेराइमा मलाई यो ककपिट गिलासको प्रतिबिम्ब हो जस्तो लाग्यो… तर होइन । यो त्यस्तो होइन, मलाई यो अहिले सैन्य हमला हो भन्ने लागिरहेको छ ।’