रौतहट । पूर्वमा बाग्मती बग्छ, पश्चिममा झाझ खोला । यी दुवैको मध्यमा पर्छ महावती कुम्हइनको घर । उमेरले ६ दशक नाघेकी महावती पाँच दिनदेखि बाग्मटीको तटबन्धमा पाल टाँगेर बसेकी छन् । बाढीले बस्ती नै डुबाएपछि ६५ वर्षीया महावतीको जीवन कष्टकर बनेको छ । पति किशोर पण्डित, चार छोराबुहारी, १६ नातिनातिनासहित महावतीको २६ जनाको परिवार बाग्मती नदीको तटमा पाल टाँगेर बसेको छ । महावतीको परिवारले २०७४ सालमा आएको बाढीले घरबार तहसनहस बनाएको घाउ निको हुन नपाउँदै फेरि अर्को बाढीको सामना गर्नुपरेको छ ।
गत शुक्रबार राति बाग्मती नदीको बाढी बस्तीमा पसेपछि बडहर्वा गाउँ नै बग्यो । बाढीले विस्थापित बनाएपछि बाग्मतीको डिलमा पाल टागेर बसेकी प्रतिमा देवी घरिघरि तर्सिन्छिन् । बाढीले घर भत्काउँदा उनी गम्भीर घाइते भएकी छन् । २०७४ को बाढीमा घरबार गुमाएकी प्रतिमाले ऋण काढेर बल्लतल्ल नयाँ घर बनाएकी थिइन् । त्यही घर पनि बगेपछि आफूमाथि ठूलो विपत्ति परेको उनले बताइन् ।
बाढीले दुर्गा भगवती गाउँपालिका वडा नम्बर ५ बडहर्वाका करिब साढे दुइ सय परिवारको बिल्लीबाठ बनायो । पीडितले आफन्तले ल्याइदिएको चिउरा, चाउचाउ र बिस्कुट अनि बाढीमा डुबेको कलको पानी खाएर पाँच दिन काटे । यसबीचमा कहीं कतैबाट राहत आएन । पाँचौं दिन भने गाउँपालिकाका अध्यक्ष अरुण साहसहितको टोली आएर थोरै भए पनि राहत सामग्री दिएको छ । बाग्मती र झाझ खोलामा गतिलो तटबन्ध नबनाइँदा बर्सेनिजस्तो बाढीको मार खेप्नुपरेको गुनासो पीडितको छ ।
बाढीको अत्याधिक चपेटामा परेका दुर्गा भगवती गाउँपालिकको वडा नम्बर १ गंगापिपराको महादेवस्थानका विस्थापितले नजिकैको सामुदायिक विद्यालयमा शरण लिएका छन् । विस्थापितमध्येकी मुगिया देवाले अन्न, लत्ताकपडा, नगद सबै बाढीले बगाइदिएको बताइन् । ‘अब ८ जनाको परिवार कसरी बाँच्ने’, उनले चिन्ता व्यक्त गरिन् । गाउँपालिकाका अध्यक्ष साहले घर गुमाएकालाई गाउँमै रहेका विद्यालय र सामुदायिक भवनमा बसाएर सामूहिक भोजनको प्रबन्ध मिलाएको जानकारी दिए । यसैबीच मंगलबार बाढी प्रभावित क्षेत्रको निरीक्षण गर्न पुगेका प्रमुख जिल्ला अधिकारी किरण थापाले राहत तथा उद्धारका लागि टोली खटाइएको बताए । बाढीले बाटो बिगारेका कारण राहत पुर्याउन कठिनाइ भएको उनले बताएको समाचार नागरिक दैनिकमा प्रकाशित छ ।
