काठमाडौं । लिभरपुलले पेनाल्टी सुटआउटमा चेल्सीलाई हराउदै युइएफए सुपर कपको उपाधि जितेको छ।
टर्कीको इस्तानबुलमा भएको खेलको निर्धारित र थप समयको खेल २-२ गोलको बराबरीमा रोकिदा त्यसपछि भएको पेनाल्टी सुटआउटमा लिभरपुल ५-४ ले विजयी भयो।
पेनाल्टीमा लिभरपुलका गोलकिपर एड्रियनले चेल्सीका टमी अब्राहमको पेनाल्टीलाई विफल पारिदिएका थिए। टमी पाँचौ नम्बरमा पेनाल्टी प्रहार गर्न आएका थिए।
त्यसअघि लिभरपुलका लागि मोहमद सलाह, रोबर्टो फिर्मिनो, फाबिन्हो, ओरिगी र अलेक्जेन्डर अर्नोल्डले गोल गरेका थिए।
चेल्सीका लागि मासन माउन्ट, रोस बार्कली, जोर्गिन्हो र इर्मसनले गोल गरेका थिए।
ओलिभर जिरुडले ३६ मिनेटमा गोल गरेपछि चेल्सीले पहिले अग्रता लियो। तर साडियो मानले ४८ मिनेटमा बराबरी गोल फर्काए।
९० मिनेटको खेल बराबरीमा सकिएपछि थपिएको ३० मिनेटमा मानेले ९५ मिनेटमा गोल गरेर लिभरपुललाई अग्रता दिलाए। तर १०१ मिनेटमा जोर्गिन्होले पेनाल्टीमा गोल गरेपछि चेल्सीले खेल बराबरीमा ल्याएको थियो।
