काठमाडौं । अमेरिकाका राष्ट्रपति डोनाल्ड ट्रम्पले ताइवानसँग भएको लडाकू विमान सम्झौतालाई औपचारिक रुपमा स्वीकृत प्रदान गरेका छन् ।
मंगबार अमेरिकाको विदेश मन्त्रालयले यसको जानकारी गराएको हो । मन्त्रालयका अनुसार यस सम्झौतामा ८ अर्ब अमेरिकी डलर रकममा ६६ वटा एफ–१६ लडाकू विमान ताइवानलाई बेचिनेछ । अमेरिकाले वर्षौंपछि ताइवानलाई यति ठूलो स्तरको सैन्य सामाग्री बिक्री गर्न लागेको हो ।
चीनले ताइवानलाई आफ्नो शासनमा आउन बाँकी भूभागको रुपमा हेर्ने गरेकाले वाशिङ्टन र बेइजिङबीच व्यापार युद्ध, हङकङजस्ता विभिन्न मुद्दामा विवाद चलिरहेको समयमा अत्याधुनिक लडाकू विमान बेच्ने खबरले दुई देशबीचको तनाव थप वृद्धि गर्ने आशंका गरिएको छ ।
शुक्रबार चिनियाँ विदेश मन्त्रालयका प्रवक्ता हुवा चुन्यीङले ताइवानलाई सैन्य सामाग्री बिक्री गरेर अमेरिकाले चीनको सार्वभौमसत्ता कमजोर बनाउने खोजेको आरोप लगाइन् ।
‘चीन यस कदमको कडा रुपमा विरोध गर्छ,’ हुवाले भनिन् । उनले अमेरिकाले ताइवानसँगको अत्याधुनिक लडाकू विमान सम्झौतालाई रद्द गर्नुपर्ने र ताइवानसँग अन्य कुनै पनि सैन्य सम्झौता गर्न नहुने बताइन् ।
‘
अघिल्लो महिना पनि ट्रम्प प्रशासनले ताइवानसँग २.२ अर्ब अमेरिकी डलरको छुट्टै हातहतियार सम्झौता गरेको थियो । त्यस अन्तर्गत १०८ वटा तोप र एकठाँउबाट अर्को ठाँउ सार्न मिल्ने विमान–झार्ने मिसाइल बेचेको थियो ।
सन् २०१० यता मात्र अमेरिकाले ताइवानलाई १५ अर्ब अमेरिकी डलर बराबरको हतियार विक्रि घोषणा गरिसकेको छ । अमेरिकाले ४० वर्ष पुरानो ‘ताइवान रिलेसन एक्ट’ अन्तगर्त ताइवानलाई हतियार बेच्छ ।