परासी । पश्चिम नवलपरासीस्थित जिल्ला पृथ्वीचन्द्र अस्पताल परासीमा अत्याधुनिक सुविधा सम्पन्न शव परीक्षण गृह निर्माण भएको छ ।नवनिर्मित शवगृहमा शव परीक्षण गर्ने र शव राख्ने छुट्टाछुट्टै कोठा रहेका छन् भने शव नगनाउने फ्रिजको व्यवस्था गरिएको छ । यसैगरी आधुनिक प्रविधिसमेत जडान गरिएकाले अब छिटोछरितो शव परीक्षण गर्न सकिने व्यवस्था मिलाइएको अस्पतालका प्रबन्धक सुरेन्द्र अधिकारीले जानकारी दिए ।
प्रदेश नं ५ स्थित सामाजिक विकास मन्त्रालयको रु ५० लाखको लागतमा बनेको उक्त शवगृहमा एकपटकमा छ वटासम्म शव चिसो बनाएर राख्न सक्ने क्षमता रहेको छ । अस्पतालमा रहेको पुरानो शवगृह सडकको छेउमा र सुविधायुक्त नभएका कारण दुर्गन्ध फैलिएर नागरिकले सास्ती पाउँदै आएका थिए । राससमा यस विषयमा पटकपटक समाचार प्रवाह भएपछि अस्पतालले प्रदेश सरकारसँग समन्वय गरी शवगृह निर्माण गरेको हो ।
शवगृह निर्माणसँगै सडक छेउमा रहेको पुरानो शवगृहलाई भत्काइने छ भने अब नयाँ शवगृहको प्रयोगबाट वातावरणसमेत स्वच्छ रहने अपेक्षा गरिएको अस्पताल व्यवस्थापन समितिका अध्यक्ष शिवशङ्कर रायले बताए । अब शवपरीक्षण गर्न र धेरै दिन राख्नुपर्ने भएमा पनि सहज हुने उनले बताए ।
अस्पतालको उत्तरपूर्वमा रहेको खाली जग्गामा निर्माण गरिएको उक्त शवगृहको आज प्रदेश नं। ५ का सामाजिक विकासमन्त्री सुदर्शन बरालले उद्घाटन गर्दै प्रदेश सरकारले अस्पतालका श्ययाभन्दा पनि सुविधा र सेवा विस्तारमा केन्द्रित रहेको बताए ।
“प्रदेशभित्र रहेका धेरै अस्पताल पुराना छन्, तर त्यहाँ आवश्यक प्रविधि, सेवा सुविधाको अभावमा बिरामीले प्रभावकारी उपचार सेवा पाउन नसकेको अवस्था देखिएपछि हामीले सेवा विस्तारलाई बढी जोड दिएका हौँ ।” उनले भने।
