काठमाडौँ । नेपाली कांग्रेसको १५औँ महाधिवेशनअन्तर्गत नयाँ केन्द्रीय कार्यसमिति चयनका लागि मतदान २ बजेपछि मात्रै सुरु हुने भएको छ।
यसअघि दिउँसो १ बजेबाट मतदान सुरु गर्ने तयारी गरिए पनि निर्वाचन व्यवस्थापन तथा प्राविधिक तयारीका कारण मतदान समय केही ढिलो हुने भएको हो। निर्वाचन समितिले मतदानका लागि आवश्यक तयारी पूरा गरेपछि मतदान सुरु गर्ने जनाएको छ।
महाधिवेशनका ७ हजार २५५ जना प्रतिनिधिले नयाँ केन्द्रीय कार्यसमिति चयनका लागि मतदान गर्नेछन्। निर्वाचन समितिले प्रतिनिधिहरूलाई मतदानका लागि अहिले नै अनावश्यक रूपमा लाइनमा नबस्न आग्रह गरेको छ।
प्रतिनिधिको प्रदेश तथा समूहअनुसार छुट्टाछुट्टै मतदान केन्द्र तोकिएको छ। बागमती प्रदेशका प्रतिनिधिले राष्ट्रिय सभा गृहमा रहेको मतदान केन्द्र ‘क’ बाट मतदान गर्नेछन् भने कोशी प्रदेश तथा तराई–मधेस समूहका प्रतिनिधिका लागि खुलामञ्चमा मतदान केन्द्र ‘ख’ तोकिएको छ।
त्यस्तै गण्डकी प्रदेशका प्रतिनिधिले हिमाल हल, मधेश प्रदेशका प्रतिनिधिले तराई–मधेस हल तथा लुम्बिनी, कर्णाली, सुदूरपश्चिम प्रदेश, नेपाली जनसम्पर्क समिति र भ्रातृ संस्थातर्फका प्रतिनिधिले पहाड हलबाट मतदान गर्ने व्यवस्था गरिएको छ।
मतदानअघि प्रतिनिधिको परिचयपत्र तथा मतदाता नामावली रुजु गरिनेछ। निर्वाचन आचारसंहिताले निषेध गरेका मोबाइल फोनलगायतका सामग्री मतदानस्थलमा लैजान पाइने छैन।
कांग्रेसको १५औँ महाधिवेशनअन्तर्गत सभापति, उपसभापति, महामन्त्री, सहमहामन्त्री तथा केन्द्रीय सदस्य पदका लागि मतदान हुँदैछ। मतदान सम्पन्न भएपछि मतगणना सुरु गर्ने निर्वाचन समितिले जनाएको छ।
