काठमाडौँ। नेपाली काँग्रेसका महामन्त्री प्रदीप पौडेलले केन्द्रिय कार्यसम्पादन समितिको आकार बढाएर ४१ सदस्यीय बनाउने प्रश्ताव अघि सार्नुभएको छ ।
पार्टीको विधानलाई समयानुकूल बनाउने उद्देश्यका साथ महाधिवेशनको बन्दसत्रमा यस्तो प्रश्ताव गर्नुभएको हो । सोमवार प्रश्तुत उक्त प्रश्तावमा पार्टीका विभिन्न तहमा नयाँ परिषद् तथा ब्युरो गठन गर्नेसम्मका रणनीतिक व्यवस्था गरिएको छ ।
महामन्त्री पौडेलले प्रश्तुत गर्नुभएको प्रश्तावअनुसार हाल ३१ सदस्यीय रहेको केन्द्रिय कार्यसम्पादन समितिलाई ४१ सदस्यीय बनाउने गरी विधान संशोधनको खाका अघि सारिएको छ ।
यसका साथै केन्द्रिय कार्यसमिति र पदाधिकारीहरूको काम, कर्तव्य र अधिकारलाई थप स्पष्ट र निर्दिष्ट बनाउँदै प्रत्येक सदस्यलाई जिम्मेवारी दिइने व्यवस्थालाई विधानमै समावेश गरिएको छ ।
पार्टीले सरकार सञ्चालनको पूर्वतयारी र जनप्रतिनिधिहरूको निरन्तर अनुगमनका लागि ‘गभर्नेन्स कमिटी’ को अवधारणा अघि सारेको छ ।
यस संयन्त्रमार्फत जनप्रतिनिधिहरूलाई जनताप्रति थप उत्तरदायी बनाउन, पार्टीसँग समन्वय बढाउन र गुणस्तरीय सेवा प्रवाह सुनिश्चित गर्न मद्दत पुग्ने विश्वास व्यक्त गरिएको छ ।
निर्वाचन केन्द्रित गतिविधिलाई व्यवस्थित गर्न नयाँ ‘निर्वाचन ब्युरो’ को व्यवस्था गरिएको छ । यसले निर्वाचनको रणनीति, प्रचारप्रसार र उम्मेदवारको मापदण्ड तय गर्नेछ । साथै, ३ सदस्यीय केन्द्रिय निर्वाचन समितिको पनि प्रश्ताव गरिएको छ ।
प्रश्तावमा जिल्ला सम्पर्क समितिहरूलाई आधिकारिकता प्रदान गर्न ‘जिल्ला सम्पर्क समिति समन्वय परिषद्’ गठन गर्ने र ज्येष्ठ नेताहरूको अनुभवलाई पार्टीमा सदुपयोग गर्न ‘ज्येष्ठ सदस्य सल्लाहकार परिषद्’ स्थापना गर्ने व्यवस्था गरिएको छ ।
उहाँले भन्नुभयो, ‘केन्द्रिय कार्यसम्पादन समिति ३१ सदस्यबाट बढाएर ४१ सदस्यीय बनाउने व्यवस्था गरिएको छ । साथै, केन्द्रिय कार्यसमिति र पदाधिकारीका काम, कर्तव्य तथा अधिकारलाई थप स्पष्ट गरिएको छ । पार्टीबाट निर्वाचित जनप्रतिनिधिलाई जनताप्रति उत्तरदायी बनाउँदै प्रभावकारी सेवा प्रवाह सुनिश्चित गर्न शासन तथा सुशासन अध्ययन संस्थानको व्यवस्था गरिएको छ । निर्वाचनको पूर्वतयारी, रणनीति निर्माण, प्रचारप्रसार तथा उम्मेदवारको मापदण्ड तय गर्न निर्वाचन ब्युरो गठन गरिनेछ । केन्द्रिय निर्वाचन समिति तीन सदस्यीय रहने व्यवस्था गरिएको छ । त्यसैगरी, जिल्ला सम्पर्क समितिहरूबीच समन्वयका लागि जिल्ला सम्पर्क समन्वय परिषद्, ज्येष्ठ सदस्यहरूको अनुभव, ज्ञान र दक्षतालाई पार्टीमा उपयोग गर्न ज्येष्ठ सदस्य सल्लाहकार परिषद् तथा युवाहरूको सहभागिता र नेतृत्व विकासका लागि कांग्रेस युवा परिषद्को व्यवस्था गरिएको छ । यी व्यवस्थाहरू केन्द्रिय समितिमा छलफल गरी प्राप्त सुझावसमेत समेटेर महाधिवेशनमा प्रस्तुत गरिएको हो । यसमा गहन छलफल गरी नेपाली कांग्रेसको विधानलाई समयानुकूल, व्यवस्थित र प्रभावकारी बनाउन सबैको सक्रिय योगदान रहने विश्वास व्यक्त गर्दछु ।’
पार्टीमा युवाहरूको सहभागिता बढाउन ‘काँग्रेस युवा परिषद्’ को अवधारणा पनि अघि सारिएको छ । –न्युज एजेन्सी नेपाल
