वासिङटन। अमेरिकी राष्ट्रपति डोनाल्ड ट्रम्पले आइतबार राष्ट्रिय गुप्तचर प्रमुख जे क्लेटनलाई ह्वाइट हाउसको कृत्रिम बुद्धिमत्ता (एआई) सम्बन्धी कार्यदलको नेता तोकेका छन् ।
अनुसन्धानकर्ताहरूले यस प्रविधिको सम्भावित खतराबारे चेतावनी दिइरहेका समय यो नियुक्ति भएको हो ।
राष्ट्रपति ट्रम्पले सामाजिक सञ्जाल ट्रुथ सोसलमा लेख्नुभएको छ, “सुपर इन्टेलिजेन्स फोर्सको नेतृत्व क्लेटनलाई सुम्पिएको छु । यसलाई संघीय सरकारको प्रयासमा समन्वय गर्ने जिम्मेवारी दिइएको छ ।”
उहाँले भन्नुभयो, “अमेरिका संसारमा ‘सुपर इन्टेलिजेन्स’मा अगाडि रहोस् । धेरैले भन्छन् यो औद्योगिक क्रान्ति र इन्टरनेटभन्दा ठूलो हो । यसले सबै अमेरिकीहरूको हित र रक्षा गर्नेछ, साथै, उनीहरूको जीवन सुधार्नेछ ।”
ह्वाइट हाउसले शनिबार २४ वर्षीया रिपोर्टर बेनी रे हार्मनीलाई प्रवक्ता तथा सहायक प्रेस सेक्रेटरी बनाएको थियो । उहाँ ‘रियल अमेरिकाज भ्वाइस’मा ह्वाइट हाउस संवाददाताका रूपमा काम गर्दै आउनुभएको थियो ।
हार्मनीले सोमबारदेखि नयाँ जिम्मेवारी सम्हाल्नुहुनेछ । उहाँको नियुक्ति ह्वाइट हाउस प्रेस सेक्रेटरीको पद खाली रहेका समय भएको छ ।
यसअघि प्रेस सेक्रेटरी रहनुभएकी क्यारोलिन लेभिट अगस्टको अन्त्यमा यो पदबाट हट्नुभएको थियो । ट्रम्प प्रशासनले अहिलेसम्म उहाँको स्थायी उत्तराधिकारीको नाम घोषणा गरेको छैन।
हार्मनी पछिल्लो समयमा ह्वाइट हाउस ‘प्रेस पूल’ को नियमित सदस्य बन्न पुग्नुभएको थियो । (रासस/एएफपी)
