काठमाडौं । सत्तारुढ नेकपाका वरिष्ठ नेता माधवकुमार नेपालले प्रधानमन्त्री तथा पार्टी अध्यक्ष केपी शर्मा ओलीसँग आफूले सहज सम्बन्ध चाहेको सन्देश पठाएका छन् । उनले कतिपय सार्वजनिक कुराहरुमा असहमति हुँदा पनि व्यक्तिगत सम्बन्धमा दरार ल्याउन नचाहेको सन्देश पठाएका हुन् ।
वरिष्ठ नेता नेपालका निकटस्थ मानिने नेकपाका नेता डा.वंशीधर मिश्रमार्फत नेता माधवकुमार नेपालले ओलीसम्म सो सन्देश पठाएको हो । मिश्रले नेपाललाई भेटेर पछिल्लो बैठकको समाचारले पार्टी र शुभेच्छुकमा नराम्रो सन्देश गएको बताएका थिए ।
बिहीबारको बैठकमा भएको चर्काचर्कीले आफूलाई पनि नराम्रो लागेको भन्दै कमी कमजोरी महसुस गरेर सम्बन्ध सहज बनाउन चाहेको उनले बताएका थिए । मिश्रले नेपाललाई संयमित हुन सुझाव दिएका छन् । नेपालले भने पार्टी अध्यक्षले आफ्नो शुभकामना चाहिँदैन भनेपछि असहज परिस्थिति उत्पन्न भएको र त्यसक्रममा कतिपय शब्दहरु प्रयोग भएको आफूले महसुस गरिसकेको पनि बताएका थिए ।
मिश्रले प्रधानमन्त्रीका जनसम्पर्क सल्लाहकार तथा नेकपा केन्द्रीय सदस्य अच्युत मैनाली र प्रेस सल्लाहकार कुन्दन अर्यालमार्फत नेपालको सो सन्देश प्रधानमन्त्रीसम्म पुर्याइदिन आग्रह गरेको स्रोतले जनाएको छ ।
