काठमाडौं । योगगुरू बाबा रामदेवका सहयोगी आचार्य बालकृष्णलाई हृदयघात भएपछि अस्पताल भर्ना गरिएको छ।
हृदयघात भएपछि शुक्रबार करिब अपरान्ह ४ बजे उनलाई ऋषिकेशस्थित एम्समा भर्ना गरिएको भारतीय सञ्चार माध्यमले जनाएका छन्।
पतञ्जली योगपिठका अनुसार उनलाई पहिला हरिद्वारस्थित अस्पतालमा लगिएको थियो। तर अस्पतालले उनलाई एम्समा रेफर गरेको हो।
उनको उपचारमा संलग्न चिकित्सक अधीक्षक ब्रहमप्रकाशले बालकृष्णलाई ‘अल्टर्ड कन्सिएयस’ स्थितिमा अस्पताल भर्ना गरिएको बताए।
‘यो अवस्थामा बिरामीले आफ्नो आसपासको माहौल चिन्न सक्दैन। उनलाई यहाँ ल्याउँदा उनमा बेचैनी थियो। उनले स्थिति पहिल्याउन सकिरहेका थिएनन्’, उनले भने।
उनको केही स्वास्थ्य परीक्षण गरिसकिएको र स्थिति सामान्य रहेको उनले बताए। उनले केही परीक्षणको रिपोर्ट आउन बाँकी रहेको जानकारी दिए।
अहिले उनी विशेषज्ञ टिमको निगरानीमा छन्।
