भद्रपुर । गत असार ३ गते झापा मेचीनगरका ५५ बर्से व्यक्तिविरुद्ध एक किशोरीले आफूलाई बलात्कार गरेको आरोपमा प्रहरीमा उजुरी दर्ता गरिन्। मेचीनगर-९ का स्थानीय विष्णु खड्काले एक वर्षयता धम्क्याएर यौन शोषण गर्दै आएको आरोप लगाउँदै आएकी ती किशोरीले इलाका प्रहरी कार्यालय धुलाबारीमा असार ३ गते किटानी जाहेरी दिएकी थिइन्। करिब ३ महिना बितिसक्दा पनि पीडक खड्का भने बेपत्ता छन्।
झापा मेचीनगर-९ को वडा कार्यालयले बलात्कारमा परेकी किशोरीको परिवारलाई घर छाड्न उर्दी जारी गरेको छ। दलित समुदायकी १७ वर्षीयालाई घरबेटी खड्काले बलात्कार गर्दै आएको ३ महिनाअघि मात्र सार्वजनिक भएको थियो। दलित किशोरीको परिवार खड्काकै घरमा डेरामा बस्दै आएको छ।
खड्काकी पत्नी पुष्पाले २ वर्षदेखि घर भाडा नतिरेको, घरमा दिनरात झै(झगडा गर्ने गरेको भन्दै वडा कार्यालयमा उजुरी दिएपछि त्यसकै आधारमा वडा कार्यालयले गत आइतबार घर छाड्न उर्दीसहित पत्र टाँसेको पीडितकी आमाले जानकारी दिइन्। उनले प्रत्येक महिना घरभाडा तिरेको बताएकी छन्। ‘घरभाडा नतिरेको बहानामा हामीलाई घर न घाटको बनाउन लागिएको हो,’ उनले भनिन्, ‘छोरी बलात्कार गरेको घटना सार्वजनिक भएपछि खड्का परिवारले यस्तो बहाना गरेको हो। त्यसभन्दा अघि सबै राम्रै थियो।’
इलाका प्रहरी कार्यालयका इन्स्पेक्टर टीकाबहादुर कार्कीले फरार अभियुक्तको खोजी तीव्र पारिएको दाबी गरेका छन्। ‘हामीले देशभरि नै पत्राचार गरेका छौं, खड्काका नेपालमा भएका आफन्तकोमा पनि खोजीको क्रम जारी छ,’ उनले भने।
दलित अधिकारकर्मी टीका मग्रातीले दलित परिवारलाई घरनिकाला गराउन स्थानीय समाज घटना बाहिरिएदेखि नै लागिपरेको आरोप लगाए। घटनालाई सुरुवातदेखि नै खबरदारी गर्दै आएकी अधिकारकर्मी सविता भण्डारी भेटवालले स्थानीय छिमेकीले समेत पटक पटक पीडित परिवारलाई घरबाट निकाल्न दबाब दिँदै आएको र अहिले भाडाको बहाना गरेको दाबी गरेकी छन्।
अन्नपुर्ण पोष्टबाट
