काठमाडौँ । नेपाली कांग्रेसका सभापति गगन थापाले पार्टीको १५औँ महाधिवेशनमा बृहत्तर एकता कायम गर्न आफूले पहल गरिरहेको बताएका छन् ।
बिहीबार सानेपास्थित पार्टी केन्द्रीय कार्यालयमा बसेको केन्द्रीय कार्यसमिति बैठकलाई सम्बोधन गर्दै थापाले पार्टीका निवर्तमान सभापति शेरबहादुर देउवासहित पूर्वपदाधिकारीहरूलाई महाधिवेशन प्रक्रियामा सक्रिय रूपमा सहभागी हुन आग्रह गरे ।
थापाले देउवालाई महाधिवेशन उद्घाटन समारोहमा सहभागी हुन विशेष आग्रहसमेत गरे । उनले भने, ‘कतिपय साथीहरूले निवर्तमान सभापति शेरबहादुर देउवाले महाधिवेशन उद्घाटन गर्नुपर्छ भन्नुभएको छ, मेरो पनि अनुरोध छ– महाधिवेशन उद्घाटनमा आउनुहोस् ।’
पार्टीभित्रको एकता कायम गर्दै महाधिवेशन सम्पन्न गर्न आफू जुनसुकै पहल गर्न तयार रहेको थापाको भनाइ छ । उनले देउवासँग मिलेर अधिवेशन अघि बढाउन कुनै बाधा नरहेको बताए ।
‘म पूर्वसभापति देउवालाई विशेष अनुरोध गर्न चाहन्छु– हामी सँगै बसेर अधिवेशन गर्न नपर्ने कुनै कारण छैन । पार्टीको बृहत्तर एकताका लागि मेरो तर्फबाट गर्नुपर्ने सबै कुरा गर्न म तयार छु,’ थापाले भने ।
सभापति थापाले आफू पार्टीको विधान, संविधान र विधिअनुसार अघि बढिरहेको उल्लेख गर्दै निर्धारित समयमै १५औँ महाधिवेशन सम्पन्न हुने दाबी गरे ।
कांग्रेसको निर्धारित कार्यतालिकाअनुसार आगामी असोज ३ र ४ गते वडा अधिवेशन हुँदैछ । त्यसपछि विभिन्न तहका अधिवेशन सम्पन्न गर्दै असोज १६ देखि १९ गतेसम्म केन्द्रीय महाधिवेशन गर्ने तयारी कांग्रेसको छ ।
बिहीबारको केन्द्रीय समिति बैठकमा निवर्तमान सभापति देउवानिकट नेताहरूको समेत सहभागिता रहेको थियो ।
