काठमाडौं । श्रम संस्कृति पार्टीका प्रमुख सचेतक आर्यन राईले छापा सञ्चारमाध्यमलाई उपलब्ध गराउँदै आएको लोककल्याणकारी विज्ञापनको रकम कटौती गर्ने सरकारको निर्णयप्रति आपत्ति जनाउनुभएको छ ।
प्रतिनिधि सभाको बिहीवारको बैठकमा बोल्दै प्रमुख सचेतक राईले आर्थिक वर्ष २०८३/८४ को बजेटमा विनियोजन गरिएको लोककल्याणकारी विज्ञापनको रकम सूचना तथा सञ्चार मन्त्रालयले कार्यविधिमार्फत घटाउने निर्णय गर्नु संसदको अधिकार र सार्वभौमिकताको अपमान भएको बताउनुभयो ।
सरकारले भदौ ५ गते कार्यविधिमार्फत लोककल्याणकारी विज्ञापनको रकम घटाउने निर्णय गरेको उल्लेख गर्दै राईले संसदबाट पारित बजेटलाई मन्त्रालयस्तरीय कार्यविधिबाट परिवर्तन गर्ने कार्य कति विधिसम्मत हो भन्ने प्रश्न उठाउनुभयो ।
उहाँले लोकतन्त्र, प्रेस स्वतन्त्रता र नागरिकको सूचनाको हकका लागि सञ्चारमाध्यमले निर्वाह गरेको भूमिकालाई ध्यानमा राख्दै लोककल्याणकारी विज्ञापनको रकम कटौती गर्नुको सट्टा समयअनुकूल वृद्धि गर्न सरकारको ध्यानाकर्षण गराउनुभयो ।
सरकारले सामाजिक सञ्जाललाई मात्र सूचनाको अन्तिम स्रोतका रूपमा हेर्ने प्रवृत्ति देखाएको भन्दै राईले नेपाली छापा सञ्चारमाध्यमको ऐतिहासिक भूमिका र महत्त्वलाई बेवास्ता नगर्न आग्रह गर्नुभयो ।
उहाँले भन्नुभयो, “आर्थिक वर्ष २०८३/८४ को बजेटमा विनियोजन भएको लोककल्याणकारी विज्ञापनको रकमलाई भदौ ५ गते सूचना तथा सञ्चार मन्त्रालयबाट जारी गरिएको कार्यविधिमार्फत घटाउने र नियन्त्रण गर्ने कार्य संसदको अधिकार र सार्वभौमिकताको अपमान हो ।”
राईले बजेट कार्यान्वयनका क्रममा सरकारका तर्फबाट हुने निर्णय र कार्यविधि संसदबाट पारित बजेटको मर्मअनुकूल हुनुपर्ने धारणा राख्नुभयो । साथै, सञ्चारमाध्यमलाई प्रोत्साहन गर्नुको सट्टा सामाजिक सञ्जाललाई मात्रै सूचनाको प्रमुख स्रोत मान्ने प्रवृत्तिले लोकतन्त्रका लागि संघर्ष गरेका नेपाली छापा सञ्चारमाध्यमको इतिहास र योगदानलाई बेवास्ता गर्ने उहाँको भनाइ थियो ।
उहाँले लोककल्याणकारी विज्ञापनको रकम कटौती गर्ने संशोधित कार्यविधि तत्काल खारेज गर्न माग गर्नुभयो । रकम घटाउने नभई समयअनुकूल वृद्धि गर्नुपर्ने उहाँको भनाइ छ ।
यसैगरी, निजी सञ्चारमाध्यमलाई सरकारी विज्ञापनबाट निषेध गर्ने सरकारी निर्णय सर्वोच्च अदालतले खारेज गरिसकेको सन्दर्भ उल्लेख गर्दै राईले सरकारी विज्ञापन वितरण प्रणालीलाई पारदर्शी, प्रभावकारी र सम्मानजनक ढङ्गले अघि बढाउन सरकारसँग आग्रह गर्नुभयो ।
