लेबनान। दक्षिणी लेबनानका विभिन्न क्षेत्रमा आईतवार बिहान इजरायलले गरेको हवाई आक्रमणमा परी चार जनाको मृत्यु भएको छ भने अन्य २० जना घाइते भएका छन् ।
लेबनानको जनस्वास्थ्य मन्त्रालयले सार्वजनिक गरेको प्रारम्भिक विवरणअनुसार उक्त हताहती भएको हो । मन्त्रालयको आपतकालीन सञ्चालन केन्द्रकाअनुसार नबातिए अल–फौकामा दुई जनाको मृत्यु र दुई जना घाइते भएका छन् ।
त्यसैगरी, नबातिएकै रहबात क्षेत्रमा भएको आक्रमणमा एक महिला र एक बालकसहित आठ जना घाइते भएका छन् । अरब सलिममा दुई जनाको मृत्यु हुनुका साथै दुई बालबालिकासहित ६ जना घाइते भएको मन्त्रालयले जनाएको छ ।
काफ्र रुमान क्षेत्रमा भएको अर्को आक्रमणमा चार जना घाइते भएका छन् । इजरायली सेनाले सामाजिक सञ्जाल ’एक्स’ मार्फत यो आक्रमण हिजबुल्लाहले आफ्ना सैनिकहरूलाई लक्षित गरी गरेको ड्रोन प्रहारको जवाफ भएको दाबी गरेको छ ।
इजरायली पक्षका अनुसार दक्षिणी लेबनानको सुरक्षा क्षेत्रमा तैनाथ सैनिकहरूमाथि हिजबुल्लाहले दुईवटा विस्फोटक ड्रोन प्रहार गरेको थियो ।
तीमध्ये एउटा ड्रोनलाई आकाशमै नष्ट गरिएको र इजरायली सैन्य पक्षमा कुनै क्षति नभएको सेनाले उल्लेख गरेको छ । यसैबीच, इजरायली सेनाले अरब सलिमका बासिन्दाहरूलाई लक्षित गरी खाली गर्ने चेतावनी (इभ्याकुएसन वार्निङ) समेत जारी गरेको थियो ।
हिजबुल्लाहको सैन्य संरचना नजिक रहेको भन्दै इजरायलले त्यहाँका नागरिकहरूलाई तोकिएको भवन र वरपरका क्षेत्रबाट कम्तीमा ३ सय मिटर टाढा जान निर्देशन दिएको थियो । आफ्ना नागरिक र सैनिकहरूमाथि हुनसक्ने खतरा न्युनिकरण गर्न सो क्षेत्रमा सैन्य कारबाही जारी रहने इजरायली सेनाको भनाइ छ ।
लेबनानको जनस्वास्थ्य मन्त्रालयको तथ्याङ्कअनुसार गत मार्च २ देखि हालसम्म लेबनानमा भएका इजरायली आक्रमणहरूमा परी मृत्यु हुनेको संख्या ४ हजार ३५८ पुगेको छ भने १२ हजार ३५९ जना घाइते भएका छन् । सिन्ह्वा/न्युज एजेन्सी नेपाल
