काठमाडौं । नेपाली कांग्रेसका सभापति गगन कुमार थापा आज बाढीपहिरो प्रभावित रसुवा जाने भएका छन्।
भोटेकोशी नदीमा आएको विनाशकारी बाढीबाट प्रभावित क्षेत्रको स्थलगत अवस्था बुझ्न थापा विज्ञहरूसहित रसुवा जान लागेका हुन्। उनले प्रभावित क्षेत्रको अवस्था, उद्धार तथा राहतको प्रगति र पुनःस्थापनाका लागि आवश्यक कामबारे स्थानीयवासी तथा सम्बन्धित पक्षसँग जानकारी लिने बताइएको छ।
बाढीका कारण रसुवासहित नुवाकोट र धादिङका विभिन्न क्षेत्रमा ठूलो जनधनको क्षति भएको छ। रसुवामा मात्रै विभिन्न जलविद्युत् आयोजनामा समेत ठूलो क्षति पुगेको छ र सयौँ व्यक्ति सम्पर्कविहीन रहेको विवरण सार्वजनिक भएको छ।
थापाले यसअघि पनि विपद्को समयमा सरकारलाई आवश्यक सहयोग गर्नुपर्ने र उद्धार तथा राहतमा उपलब्ध सबै स्रोत परिचालन गर्नुपर्ने धारणा राख्दै आएका छन्।
