काठमाडाैँ । प्रमुख प्रतिपक्षी दल नेपाली कांग्रेसका सांसद अर्जुननरसिंह केसीले नेपाली सेनाको जस्तै देखिने पोशाक र दर्जाको चिन्ह लगाएर उद्धारमा खटिएको ‘ग्रीन आर्मी नेपाल’को वैधानिकतामाथि प्रश्न उठाउनुभएको छ ।
बिहीबार बसेको प्रतिनिधिसभाको बैठकमा बोल्दै सांसद केसीले रसुवाको भोटेकोशी क्षेत्रमा आएको बाढीपछि उद्धारमा सक्रिय देखिएको उक्त समूहबारे सरकारले स्पष्ट पार्नुपर्ने बताउनुभयो ।
उहाँले सैनिक पोशाक र दर्जाको चिन्हसहित उपस्थित हुने उक्त समूहको प्रकृति र वैधानिकताबारे गम्भीर प्रश्न उठाउँदै यो निजी सैन्य कम्पनी हो कि होइन भन्ने स्पष्ट पार्न सरकारको ध्यानाकर्षण गराउनुभयो ।
‘ग्रीन आर्मी भनेको के जात हो ? कहाँबाट आयो ? यसमाथि मेरो गम्भीर प्रश्न छ । यो सैनिक पोशाक र दर्जाको चिन्हसँगै उपस्थित भएको छ, के यो प्राइभेट मिलिटरी कम्पनी हो ? अमेरिकाको ब्ल्याकवाटर, रुसको वाग्नर हो कि अथवा के हो ?’ उहाँले प्रश्न गर्नुभयो ।
नेपालमा नेपाली जनताले एउटै नेपाली सेनालाई चिनेको उल्लेख गर्दै उहाँले अन्य कुनै सेनाको अस्तित्व स्वीकार्य नहुने धारणा राख्नुभयो ।
सांसद केसीले विपद्को समयमा देखिएका राजनीतिक विमतिलाई एकीकृत गर्न तथा नीतिगत व्यवस्थापन र अनुगमन प्रभावकारी बनाउन प्रतिनिधिसभाबाट तत्काल उच्चस्तरीय समिति गठन गर्न माग गर्नुभयो ।
उहाँले विपद् व्यवस्थापनका क्रममा सरकारले राजनीतिक दलहरूसँग प्रभावकारी समन्वय गर्न नसकेको टिप्पणीसमेत गर्नुभयो । विपक्षी दलहरू सरकारको साथमा रहेको भन्दै उहाँले भोटेकोशी बाढीपछिको खोज, उद्धार र राहत कार्यलाई थप तीव्र बनाउन सरकारको ध्यानाकर्षण गराउनुभयो ।
