हेटौँडा । रसुवाको भोटेकोशीमा आएको विनाशकारी बाढीपछि बागमती प्रदेश सरकारले उद्धार, राहत, यातायात व्यवस्थापन तथा पुनर्स्थापनाका कामलाई तीव्रता दिएको छ । प्रदेश सरकारले बाढी प्रभावित रसुवा र नुवाकोटमा तीनै तहका सरकारबीच समन्वय गरी तत्कालीन राहतदेखि क्षतिग्रस्त पूर्वाधार पुनर्निर्माणसम्मका काम अघि बढाएको जनाएको छ ।
बाढी आएको भदौ १० गते साँझ नै प्रदेश सरकारले नुवाकोटको विदुरमा स्थलगत निरीक्षण गरी सङ्घीय सरकार तथा स्थानीय तहका अधिकारीसँग छलफल गरेको थियो । त्यसको भोलिपल्ट भदौ ११ गते बिहान ७ः१५ बजे तीन तहका सरकारका अधिकारीबीच समन्वय बैठक गरी उद्धार गरिएकालाई चार स्थानमा आश्रय, खाना तथा स्वास्थ्य सेवा उपलब्ध गराउने व्यवस्था मिलाइएको थियो । प्रभावित क्षेत्रमा चारवटा हेल्थ क्याम्पसमेत सञ्चालनमा ल्याइएको प्रदेश सरकारले जनाएको छ ।
उद्धार तथा राहतलाई प्रभावकारी बनाउन भदौ ११ गते विदुरमा सम्पर्क तथा समन्वय केन्द्र स्थापना गरी पाँचवटा विषयगत कार्यदल गठन गरिएको थियो । सोही दिन दिउँसो १ः३० बजे प्रदेश सरकारको हेटौँडास्थित गोदाममा मौज्दात रहेका २८० थान त्रिपाल, ५० थान टेन्ट तथा १७० सेट गैरखाद्य सामग्री प्रभावित क्षेत्रमा उपलब्ध गराइएको थियो ।
मुख्यमन्त्रीको नेतृत्वमा प्रदेश सरकारको टोली धुन्चे पुगेको थियो । बाढीका कारण प्रभावित नागरिकको आवागमन सहज बनाउन विदुर–काठमाडौंबीच करिब १०० नागरिकको आवागमन व्यवस्थासमेत मिलाइएको प्रदेश सरकारले जनाएको छ ।
भदौ १२ गते रसुवा र नुवाकोटमा सर्वपक्षीय बैठक आयोजना गरी उद्धार, राहत तथा पुनर्स्थापनाका विषयमा आवश्यक निर्णय गरिएको थियो । अस्पताल, यातायात तथा टेलिकम सेवा सञ्चालनमा सहयोग पुर्याउन ४०० लिटर डिजेल र २०० लिटर पेट्रोल उपलब्ध गराइएको छ । साथै, उद्धार, राहत र पुनर्स्थापनाका लागि थप १० जना अधिकृत कर्मचारी परिचालन गरिएको प्रदेश सरकारले जनाएको छ ।
बाढीबाट भएको क्षति तथा तत्काल आवश्यक राहत सामग्रीको यकिन विवरण संकलन गर्न प्रदेश सरकारले स्थानीय तहसँग क्षति र राहत आवश्यकताको विवरण माग गरेको छ ।
बाढीका कारण ४० भन्दा बढी पुल क्षतिग्रस्त भएपछि प्रदेश सरकारले बेलिब्रिज, झोलुङ्गे पुल तथा तुइन निर्माणको सम्भाव्यता अध्ययन र प्राथमिकता निर्धारणको काम अघि बढाएको छ । अत्यावश्यक स्थानमा यस्ता संरचना निर्माणको कामलाई द्रुत गतिमा अगाडि बढाइएको प्रदेश सरकारको भनाइ छ ।
प्रभावित नागरिक तथा यात्रुको आवागमन सहज बनाउन धुन्चे–महावीर, चौगटे–काठमाडौं र विदुर–काठमाडौं निःशुल्क बस सेवा सञ्चालन गरिएको छ । धुन्चेसम्म पुग्ने वैकल्पिक मार्ग सञ्चालनमा ल्याउने कामलाई समेत तीव्रता दिइएको प्रदेश सरकारले जनाएको छ ।
बाढीका कारण विभिन्न स्थानमा अलपत्र परेका यात्रुका लागि खानपानको व्यवस्था मिलाउनुका साथै अवरुद्ध सडक सफा गरी यातायात सञ्चालनमा ल्याउने कामलाई प्राथमिकताका साथ अघि बढाइएको छ । प्रदेश सरकारले आफ्ना कर्मचारीलाई निरन्तर उद्धार, राहत तथा पुनर्स्थापनाको काममा खटिन निर्देशन दिएको छ ।
यसैबीच, विपद् व्यवस्थापनमा विद्यावारिधि गरेका डा. दीपकविक्रम थापा क्षेत्रीलाई बागमती प्रदेश सरकारले विपद् व्यवस्थापनसम्बन्धी डिजास्टर एडभाइजरका रूपमा परिचालन गरेको जनाएको छ । उहाँले विपद्पछिको उद्धार, राहत, पुनर्स्थापना तथा जोखिम न्यूनीकरणसम्बन्धी काममा प्रदेश सरकारलाई प्राविधिक तथा नीतिगत सुझाव दिइरहनुभएको छ ।
प्रदेश सरकारले तत्कालीन उद्धार तथा राहतसँगै क्षतिग्रस्त सडक, पुललगायतका पूर्वाधार पुनःस्थापना र प्रभावित क्षेत्रलाई नियमित यातायात तथा अत्यावश्यक सेवासँग जोड्ने कामलाई प्राथमिकतामा राखेको जनाएको छ ।
